युद्धमा ‘शान्ति’ को सट्टा ‘विराम’ नखोज्न भोलोदिमिर जेलेन्स्कीको आग्रह

न्युयोर्क : युक्रेनले विश्वलाई रूसको युद्धमा ‘शान्ति’ को सट्टा ‘विराम’ नखोज्न आग्रह गरेको छ ।

युक्रेनका राष्ट्रपतिले विश्व नेताहरूलाई युद्ध सुरु भएको दुई वर्षभन्दा बढी समय बितिसक्दा पनि आफ्नो देशको साथ दिन र ‘वास्तविक, न्यायपूर्ण शान्ति’ को सट्टा ‘विराम’ नखोज्न आग्रह गरेका छन्।

भोलोदिमिर जेलेन्स्कीले बुधबार न्युयोर्कमा संयुक्त राष्ट्रसंघको महासभालाई सम्बोधन गर्दै यो सन्देश दिएका हुन्। उनले भने – हामी युक्रेनबाट रूसी सेनाको निष्कासन र युद्ध अपराधहरूको न्यायको माग गर्दछौँ।

‘शान्ति खोज्ने कुनै पनि समानान्तर वा वैकल्पिक प्रयासहरू वास्तवमा युद्धको अन्त्यको सट्टा विराम प्राप्त गर्ने प्रयासहरू हुन्,’ जेलेन्स्कीले संयुक्त राष्ट्रसंघीय निकायलाई भने – जब यो विनाशकारी युद्ध सुरु भएको ३१ महिनाभन्दा बढी भइसकेको छ र लाखौं मानिसहरूको ज्यान लिइसकेको छ।

जेलेन्स्कीले चीन र ब्राजिललाई विशेष रूपमा उल्लेख गर्दै उनीहरूले ‘आधा मनले’ समाधान योजनाहरू अघि सारेको भन्दै आरोप लगाए । उनीहरूलाई ‘युक्रेनको खर्चमा’ आफ्नै स्वार्थको लागि खेल्ने आरोप लगाए।

शुक्रबार, २० संयुक्त राष्ट्रसंघका सदस्य राष्ट्रहरूका प्रतिनिधिहरूले चीन र ब्राजिलले तयार पारेको छ बुँदे शान्ति योजनाबारे छलफल गर्ने तयारी छ । जुन जेलेन्स्कीको प्रस्तावको विकल्पको रूपमा प्रस्तुत गरिएको छ। यो योजनाले तनाव नबढाउने, मानवीय सहायता बढाउने, आणविक प्रसार रोक्ने प्रयासहरू र रूस र युक्रेन दुवैले समर्थन गरेको अन्तर्राष्ट्रिय सम्मेलनको आह्वान गर्दछ।

आणविक विकिरणको डर

जेलेन्स्कीको संयुक्त राष्ट्रसंघको सम्बोधन त्यतिबेला आयो जब रूसी सेनाले पूर्वी युक्रेनमा थप प्रगति गरेको दाबी गरेको छ । जसमा डोनेट्स्क क्षेत्रमा गोस्त्रे र ग्रिगोरिभ्का बस्तीहरू कब्जा गरेको समावेश छ।

कीभलाई अब डर छ कि युद्धले पहिले नै क्षतविक्षत भइसकेको आफ्नो ऊर्जा पूर्वाधारमा रूसी आक्रमणहरू तीव्र हुन सक्छन् । जसले आगामी जाडो महिनाहरूमा थप जोखिममा पार्न सक्छ।

‘रूसले युद्धभूमिमा हाम्रो जनताको प्रतिरोधलाई पराजित गर्न नसकेकोले, पुटिन युक्रेनी भावनालाई तोड्ने अन्य उपायहरू खोजिरहेका छन्,’ जेलेन्स्कीले संयुक्त राष्ट्रसंघको सभालाई भने – उनको एउटा तरिका हाम्रो ऊर्जा पूर्वाधारलाई लक्षित गर्नु हो।

युक्रेनी नेताले विशेष गरी देशका आणविक ऊर्जा संयन्त्रहरूमा सम्भावित रूसी आक्रमणहरूको चेतावनी दिए । उनले यस्ता योजनाहरूको गुप्तचर सूचना प्राप्त गरेको बताए।