बेंगलुरु हत्या प्रकरणमा नयाँ मोड : हत्यारा भनिएका व्यक्ति मृत फेला, सुसाइड नोट पनि भेटियो

काठमाडौं । भारतको बेंगलुरुमा नेपाली महिलाको हत्या घटनाले नयाँ मोड लिएको छ । घटनामा संलग्न रहेको आशंकामा प्रहरीको निगरानीमा रहेका एक पुरुष मृत फेला परेका छन् ।

मुक्ति रञ्जन राय नामका ती व्यक्ति उडिसा राज्यको भद्रक क्षेत्रमा रुखमा झुण्डिएको अवस्थामा  मृत फेला परेका हुन् । रायको साथबाट एउटा झोला, नोटबुक र स्कुटर बरामद गरिएको भारतीय प्रहरीले जनाएको छ । शव फेला परेपछि सम्पूर्ण क्षेत्रमा त्रास फैलिएको छ ।

प्रहरीले शव परिवारलाई बुझाएको छ । घटनास्थलमा प्रहरीले सुसाइड नोटसमेत फेला पारेको छ । उनले सुसाइड नोटमा बेंगलुरुमा नेपाली महिला एच महालक्ष्मी दासको हत्या गरेको स्वीकार गरेका छन् ।

आफूले नै दासको शव टुक्रा पारेर फ्रिजमा राखेको उनले सुसाइड नोटमा उल्लेख गरेको प्रहरीले बताएको छ ।

भारतीय संचारमाध्यमका अनुसार रायका भाइसँग सोधपुछ गर्दा बेंगलुरु प्रहरीले यस आत्महत्याको जानकारी पाएपछि ओडिसा प्रहरीसँग सम्पर्क गरी घटनाको पुष्टि गरेको थियो ।

उडिसा प्रहरीकाअनुसार मुक्तिले बुधबार बिहान ५ देखि साढे ५ बजेको बीचमा आत्महत्या गरेका थिए । यता बेंगलुरु प्रहरी भने उनको लोकेशन ट्र्याक गर्दै छिट्टै पक्राउ गर्ने तयारीमा थियो ।

प्रहरीले महालक्ष्मी हत्याकाण्डका मुख्य अभियुक्त मानेको रायलाई पहिचान गरिसकेको सुसाइड नोटबाट ठूलो खुलासा भएको छ ।

बेंगलुरुमा नेपाली महिलाको हत्या : श्रीमान्‌सँग टुटेको थियो सम्बन्ध, घर आउजाउ गर्ने पुरुषमाथि शंका

सेप्टेम्बर २१ मा महालक्ष्मीको शव छरिएको अवस्थामा फ्रीजमा भेटिएको थियो । करिब १९ दिनअघि महालक्ष्मीको हत्या भएको आशंका गरिएको छ । प्रहरीले महालक्ष्मीको कोठामा राखिएको ट्रली झोला पनि फेला पारेको छ ।

बेंगलुरु प्रहरी स्रोतकाअनुसार हत्याराले शवका अंग एउटै झोलामा राखेर बाहिर कतै फाल्ने षड्यन्त्र गरेको हुनसक्छ । तर, यो क्षेत्र धेरै भीडभाड भएकाले उसले शवका टुक्रा फाल्ने मौका पाएन ।

घटनास्थलको निरीक्षणपछि हत्या गरी शव टुक्राटुक्रा पारेर कोठा र बाथरूम सफा गर्ने प्रयास गरिएको प्रहरीले जनाएको छ । पोस्टमार्टमपछि शव महालक्ष्मीको परिवारलाई बुझाइएको छ । त्यसपछि बेंगलुरुमै उनको अन्तिम संस्कार गरिएको थियो ।

हत्यारा भनिएकाको भाइसम्म पुग्यो प्रहरी 

अब सबैभन्दा ठूलो प्रश्न महालक्ष्मीको हत्यारा राय नै हुन् वा अरु कोही ? हत्याको कारण के हो ? त्यसैले बेंगलुरु प्रहरी स्रोतलाई विश्वास गर्ने हो भने महालक्ष्मीको हत्यारा राय नै हुन् ।

यति मात्र होइन रायको परिवार मुम्बईमै बस्ने गरेको प्रहरीले जनाएको छ । राय पश्चिम बंगालका बासिन्दा हुन् । बैंगलोर प्रहरीले रायका भाइलाई भेटेको छ । महालक्ष्मीको हत्यापछि दाइले आत्महत्या गरेको हुनसक्ने रायका भाइले बयान दिएका थियो ।

भाइको वयानपछि बेंगलुरु पुलिसले सीसीटीभी क्यामेराबाट हत्याराको बारेमा महत्त्वपूर्ण प्रमाण र सुरागहरू जुटाएको थियो । महालक्ष्मी बस्ने व्यालिकवाल क्षेत्रमा उनको घर जाने र जाने बाटोमा केही ठाउँमा सीसीटीभी क्यामेरा जडान गरिएको थियो ।

राय पनि उक्त क्यामेरामा कैद भएका थिए । बेंगलुरु प्रहरीले हत्यारा राय नै भएको बताउँदै उनलाई पक्राउ गर्न देशका धेरै ठाउँमा प्रहरी टोली पठाएको थियो । प्रहरीलाई पहिले नै हत्याराको नाम पनि प्राप्त भइसकेको थियो तर, हत्यारा सचेत नहोस् भनेर नाम भने खुलाइएको थिएन ।

प्रहरीकाअनुसार महालक्ष्मीसँग रायको घनिष्ठ सम्बन्ध थियो ।

भारतमा नेपाली महिलाको निर्ममतापूर्वक हत्या, फ्रीजमा सडेको अवस्थामा भेटियो शव