विद्यार्थीलाई प्रचण्डको आह्वान- तपाईंहरू सडकको बाघ बन्नुस्, म संसद्को सिंह बन्छु

काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ पार्टी पुनर्निर्माण गर्ने बताएका छन् ।

बिहीबारबाट सुरु भएको अखिल क्रान्तिकारीको २३औं सम्मेलनलाई सम्बोधन गर्दै प्रचण्डले यस्तो बताएका हुन् ।

“हामीले पार्टी पुनर्निर्माणको काम गर्नेछौँ । समुदायसँगको हाम्रो सम्बन्ध कमजोर भएको छ, यसलाई पुन: बनाउने गरी समीक्षामा केन्द्रित छौँ । पार्टी पुनर्निर्माणमा केन्द्रित हुँदै गर्दा विद्यार्थी सङ्गठनसँग अपेक्षाहरू छन्,” उनले भने ।

उनले विद्यार्थीहरूलाई दह्रोगरी सडकमा उत्रिन आह्वान गरेका छन् । पछिल्लोपटक आफू सरकारबाट बाहिरिएको प्रसङ्ग जोड्दै उनले भने, “तपाईंहरू सडकको बाघ बन्नुस्, म प्रतिनिधि सभाको सिंह बन्छु ।”

अगाडि उनले भने, “दलालहरूले सङ्ख्याको बलमा बाहिर पारे । तर, तपाईंहरूको साथ रह्यो भने केही महिनाभित्रै परिस्थिति उल्ट्याउन सकिन्छ । हामी सरकारबाट बाहिरिँदै गर्दा खुसी हुँदै बाहिरिएका हौँ । अब फेरि जनताको तागत लिएर हामी आउनेछौँ ।”