बिर्तामोडमा सुन चोरीमा संलग्न तीन जना पक्राउ

झापा, २७ जेठ । झापाको बिर्तामोड आसपासका क्षेत्रमा चोरीका घटना बढेसंगै प्रहरीले चोरीमा संलग्नहरुलाई धमाधम पक्राउ गर्न थालेको छ ।

गत फागुन २२ गते अर्जुनधारा–६ दासपुलस्थित इन्दिरा रिजाल संग्रौलाको घरबाट चोरी गर्ने तीन जनालाई प्रहरीले पक्राउ गरेको छ । संग्रौलाको घरबाट १० तोला बराबरको सुनको बाला, तिलहरी, सिक्री, मंगलसुत्र, नौगेडी, झुम्का, हिराको औठी,६ तोला बराबरको चाँदीको पाउजु लगायतका गरगहना चोरी भएको थियो । सो घटनामा संलग्नहरुलाई सोमबार पक्राउ गरिएको इलाका प्रहरी कार्यालय बिर्तामोडले जनाएको छ ।

पक्राउ पर्नेमा बिर्तामोड–२ चारपानेका २८ वर्षीय सुरज राई, चोरीको गर–गहना खरिद गर्ने बिर्तामोड–१ नारायण चोकका ४९ वर्षीय अरविन्दकुमार विश्वकर्मा (कालिगढ) र शेरावाली ज्वेलर्स बिर्तामोडका सञ्चालकका छोरा सुभान्सु साह रहेका छन् ।

राईले चोरी गरेको गरगहना विश्वकर्मालाई बिक्री गरेका थिए भने विश्वकर्माले साहलाई बिक्री गरेका थिए । चोरी गरेको ६.९९५ तोला सुन गालेर ढिक्का बनाइराखेको अवस्थामा बिर्तामोड–५ हिकोला रोडस्थित शेरावाली ज्वेलर्सबाट बरामद भएको इलाका प्रहरी कार्यालयका प्रहरी निरीक्षक सन्तोष राईले बताए ।

The post बिर्तामोडमा सुन चोरीमा संलग्न तीन जना पक्राउ appeared first on Jhapa Online.