सिरियामा ‘तत्काल युद्धविराम’ घोषणापछि पनि भिडन्त जारी, अहिलेसम्म ९४० भन्दा बढीको मृत्यु

काठमाडौं । सिरियाका अन्तरिम राष्ट्रपति अहमद अल-शाराले ‘तत्काल युद्धविराम’को घोषणा गरे पनि दक्षिणी शहर सुवैदामा साम्प्रदायिक भिडन्त रोकिएको छैन ।

पछिल्लो सातादेखि जारी द्वन्द्वमा हालसम्म ९४० भन्दा बढीको ज्यान गएको बीबीसीले जनाएको छ ।

सरकारी सुरक्षा बलहरू सुवैदामा तैनाथ भएपछि केही समयका लागि भिडन्त रोकिएको त्यहाँको गृह मन्त्रालयले बताएको थियो । तर, समाचार एजेन्सी रोयटर्सका अनुसार प्रान्तका अन्य भागमा झडप जारी छ ।

यसै साता इजरायली सेनाले ड्रुज समुदायप्रति ऐक्यबद्धता देखाउँदै सिरियाली सरकार र डिफेन्स मन्त्रालयको लक्ष्यविरुद्ध दमास्कसमा आक्रमण गरेको थियो । त्यसपछि अमेरिकी मध्यस्थतामा युद्धविरामको घोषणा भएको थियो । युद्धविरामअन्तर्गत इजरायली आक्रमण रोक्ने सहमति यस सर्तमा गरिएको थियो कि ड्रुज नागरिकको सुरक्षा सुनिश्चित गरिनेछ ।

सुवैदा शहरमा सरकारी फौजले नयाँ सुरक्षा चेकपोइन्ट बनाउँदै भिडन्त रोक्ने प्रयास गरिरहेका छन् । तर, अझै पनि सहरभित्र गोलीबारी भइरहेको रिपोर्टहरू आएका छन् ।

ड्रुज समुदाय सिरियामा अल्पसंख्यक हो, जसले शिया इस्लामसँग सम्बन्धित रहस्यमय धार्मिक परम्परा पछ्याउँछ । दमास्कस सरकारप्रति उनीहरूको अविश्वास विगतदेखि रहँदै आएको छ । इजरायली विदेशमन्त्री गिदेओन सारले सामाजिक सञ्जालमा लेख्दै सिरियामा अल्पसंख्यक हुनु “अत्यन्त खतरनाक” रहेको बताएका छन् ।

प्रधानमन्त्री बेन्जामिन नेतान्याहूले सिरियामा ड्रुजहरूमाथि आक्रमण हुन नदिने प्रतिबद्धता व्यक्त गरेका छन् । इजरायलमा बसोबास गरिरहेका ड्रुज समुदायसँगको सम्बन्धका कारण सिरियास्थित ड्रुजहरूको सुरक्षा इजरायली चासोको विषय बनेको हो ।

सुवैदामा ड्रुज र बेदुइनबीचको तनाव गत आइतवार ड्रुज व्यापारीको अपहरणपछि हिंसात्मक भिडन्तमा परिणत भएको थियो ।