ट्रम्पका लागि टाउको दुखाइ बनिरहेको एपस्टाइन स्क्यान्डल

जेफ्री एपस्टाइनको मृत्यु भएको छ वर्ष बितिसक्यो, तर उनको नाम फेरि एकपटक अमेरिकी राजनीतिमा चर्चाको विषय बनेको छ । उक्त चर्चामा राष्ट्रपति डोनाल्ड ट्रम्प भने विवादको केन्द्र बन्न पुगेका छन् ।

सन् २००३ मा एपस्टिनको ५०औँ जन्मदिनको नोटसङ्ग्रहमा एक नग्न महिलाको स्केच र ट्रम्पको हस्ताक्षरसहितको पत्र समावेश गरिएको रिपोर्ट वाल स्ट्रिट जर्नलले सार्वजनिक गरेपछि यो विषयमा चर्चा चुलिएको हो ।

ट्रम्पले आफूविरुद्ध फेक समाचार लेखेको भन्दै वाल स्ट्रिट जर्नल, उक्त कम्पनीका मालिक रुपर्ट मर्डोक र दुई पत्रकारहरू खादिजा सफदर र जोसेफ पलाजोलोविरुद्ध मुद्दा दायर गरेका छन् । साथै, उनले १० अर्ब डलर क्षतिपूर्ति माग गरेका छन् । पत्रकारहरूले “राष्ट्रपति ट्रम्पले २००३ मा जेफ्री एपस्टाइनलाई उनको ५०औँ जन्मदिनमा पत्र लेखेको र हस्ताक्षर गरेको तथ्यलाई बनावटी ढंगले प्रस्तुत गरेको” भन्दै आफूमाथिको आरोपलाई ट्रम्पले अस्वीकार गरेका छन् ।

यो विषय एपस्टाइनको ‘ग्राहक फाइल’सँग सम्बन्धित छ । ‘ग्राहक फाइल’ भनेको‍ अमेरिकाका धनाढ्य र शक्तिशाली राजनीतिज्ञहरूका लागि ‘किशोरीहरू यौनसम्बन्धका लागि व्यवस्था गर्ने’ तरिका हो । एपस्टाइनले न्युयोर्क र फ्लोरिडाको पाम–बिचमा रहेका आफ्ना महलमा शक्तिशाली व्यक्तिहरूका लागि मनोरञ्जनको व्यवस्था गर्थे । एपस्टिनको क्यारेबियनमा एउटा निजी टापु नै थियो । उनले आफ्ना पाहुनालाई त्यहाँ लैजान निजी विमान प्रयोग गर्दथे भन्ने विभिन्न रिपोर्ट सार्वजनिक भइसकेका छन् ।

वाल स्ट्रिट जर्नलको रिपोर्टपछि यो विषय फेरि चर्चामा आएको छ ।

एपस्टाइन को थिए ? 

सन् १९५३ मा जन्मिएका एपस्टाइन ७० को दशकमा न्युयोर्कको एक स्कूलमा गणित र भौतिकशास्त्र पढाउँथे । भनिन्छ – त्यो स्कूलमा पढ्ने एक विद्यार्थीका बुबा उनीबाट धेरै प्रभावित थिए । ती व्यक्तिले नै उनलाई वाल स्ट्रिट लगानी बैंक बेयर स्टर्न्ससँग सम्बन्धित एक लगानीकर्तासँग परिचय गराएका थिए ।

त्यसको चार वर्षपछि एपस्टाइन बेयर स्टर्न्समा साझेदार बने । यद्यपि, सन् १९८१ मा एपस्टाइनलाई ठगीको आरोपमा बर्खास्त गरियो । एक वर्षपछि उनले आफ्नै फर्म, ‘एपस्टाइन एण्ड कम्पनी’ खोले । यो फर्मले अर्बपतिहरूलाई वित्तीय सल्लाह प्रदान गर्दथ्यो । त्यसमार्फत उनले धेरै धनी व्यक्तिको पैसा ‘व्यवस्थापन’ गरेको बताइन्छ ।

एपस्टाइन भन्ने गर्थे, “मैले ‘१ अर्ब डलर’ भन्दा बढी सम्पत्ति भएका ग्राहकहरूको पैसा मात्र व्यवस्थापन गरेँ ।” तर, पछि धेरै अनुसन्धानहरूले उनको वास्तविक व्यवसाय धेरै शंकास्पद रहेको पत्ता लगाए ।

उनी केही वर्षमै धेरै धनी भए । एपस्टाइनले चाँडै नै आफ्नो सम्पत्ति खर्च गर्न थाले र न्यू मेक्सिकोमा एउटा फार्महाउस (१९९३), न्यूयोर्कमा सबैभन्दा ठूलो निजी घर (१९९६), र फ्लोरिडामा एउटा हवेली (२००२) किने । उनी त्यतिबेला अमेरिकामा घरघरमा परिचित भइसकेका थिए । ठूला व्यक्तित्वहरूसँग घुलमिल हुन्थे । उनले बिल क्लिन्टन, प्रख्यात वैज्ञानिक स्टीफन हकिङ र पपस्टार माइकल ज्याक्सनजस्ता सेलिब्रेटीहरूले भाग लिने भव्य पार्टीहरू आयोजना गर्थे ।

ट्रम्प-एपस्टाइनको भेट र झगडा

ट्रम्प र एपस्टाइनको भेट पनि एउटा पार्टीमा भएको थियो । उनीहरूको सम्बन्ध गज्जबले चलेको थियो । एपस्टिन, ट्रम्प, एपस्टिनकी प्रेमिका म्याक्सवेल र ट्रम्पकी पत्नी मेलानियाले विभिन्न सामाजिक कार्यक्रममा खिचाएका तस्वीरहरू सार्वजनिक भइसकेका छन् ।

सन् २००२ मा एक पत्रिकासँगको अन्तर्वार्तामा ट्रम्पले भनेका थिए, “म जेफलाई १५ वर्षदेखि चिन्छु, ऊ एकदमै राम्रो मान्छे हो । हामी दुवैलाई जवान सुन्दर केटीहरू मनपर्छ ।”

यो कथन पछि आएर ट्रम्पकै लागि समस्या बन्यो । सन् १९९२ मा ट्रम्पले फ्लोरिडाको आफ्नो मार-ए-लागो रिसोर्टमा एपस्टाइन र चियरलीडरहरूसँग पार्टी आयोजना गरेका थिए । २०१९ मा एनबीसीले यसको फुटेज सार्वजनिक गर्‍यो । जसमा ट्रम्प एक महिलालाई औंल्याउँदै झुकेर भन्छन् – हेर उनी धेरै आकर्षक छिन् ।

“एपस्टिनको निजी विमानमा समेत ट्रम्पले सातपटक यात्रा गरेको फ्लाइट लगको विवरणले देखाउँछ” भनेर द न्युयोर्क टाइम्सले लेखेको छ । सो कुरा ट्रम्प स्वयंले स्वीकार्दै एपस्टिनको निजी विमानमा यात्रा गरेको बताएका छन् । तर, उक्त विमान चढेर कहिले पनि एपस्टिनको निजी टापुमा नगएको उनको दाबी छ । त्यस्तै, एपस्टिनसँग कुनै अवाञ्छित गतिविधिमा संलग्न नभएको पनि उनको दाबी छ ।

न्युयोर्क टाइम्सका अनुसार ट्रम्पले यी यात्राहरू १९९३ देखि १९९७ सम्म गरेका थिए । यद्यपि, यी उडानहरू प्रायः पाम र न्युयोर्क बीचमा भएका थिए । ट्रम्पले भनेका थिए, “म कहिल्यै एपस्टाइनको निजी टापुमा गइनँ र केही गलत गरिनँ ।”

तर, ट्रम्प र एपस्टाइनको मित्रतामा दरार सन् २००४ मा फ्लोरिडाको पाम बिचमा बनेको ‘हाउस अफ फ्रेन्डशिप’ सम्पत्तिलाई लिएर आएको थियो । यो सम्पत्ति नर्सिङ होमका व्यवसायी आबे गोस्म्यानको थियो, जुन व्यवस्थापकीय लापरबाहीका कारण लिलामी भइरहेको थियो ।

ट्रम्प र एपस्टाइन दुवै यो ६ एकडको सम्पत्ति किन्न चाहन्थे । ट्रम्पले यसलाई अमेरिकाको सबैभन्दा राम्रो जग्गाको रूपमा वर्णन गरेका थिए । उनको उद्देश्य यसलाई किन्ने, रूपान्तरण गर्ने र त्यसपछि बेच्ने थियो । जबकि एपस्टाइन भने त्यहाँ बस्न चाहन्थे ।

नोभेम्बर १५, २००४ मा वेस्ट पाम बीचमा यसको लिलामी भएको थियो । ट्रम्प यसमा प्रत्यक्ष रूपमा उपस्थित हुन सकेनन्, तर उनले टेलिफोनमार्फत भाग लिए । एपस्टाइनको तर्फबाट तीन वकिलहरूले बोली लगाएका थिए । ट्रम्पले उनीहरूभन्दा धेरै रकमको बोली लगाएर सम्पत्ति प्राप्त गरे ।

उक्त घर जग्गा विवादपछि ट्रम्प र एपस्टाइनबीच कुनै पनि कुराकानीको सार्वजनिक रेकर्ड छैन । पछि सन् २०१९ मा ट्रम्पले भनेका थिए, “मेरो र एपस्टाइनको बीचमा झगडा भएको थियो र १५ वर्षदेखि एकअर्कासँग कुरा गरेका छैनौँ । म अब एपस्टाइनलाई साथी मान्दिनँ ।”

एपस्टाइनमाथि यौन दुर्व्यवहारको आरोप

सन् २००५ मा १४ वर्षीया बालिकाकी आमाले प्रहरीमा उजुरी दिइन् । जसमा उनले आफ्नी छोरीलाई ‘मसाज’ गर्ने बहानामा एपस्टाइनको विलासी घरमा बोलाएको, तर त्यहाँ पुगेपछि यौनसम्बन्ध राख्न दबाब दिएको उल्लेख गरिन् ।

जब बालिका घर फर्किइन् र आफ्ना आमाबाबुलाई यो कुरा बताइन्, आमाबाबुले तुरुन्तै प्रहरीमा गुनासो गरेका थिए । त्यसपछि पहिलो पटक एपस्टाइनविरुद्ध आधिकारिक उजुरी दर्ता गरियो । प्रहरी अनुसन्धानको क्रममा यो पृथक घटना नभएको कुरा बाहिर आयो ।

बिस्तारै एपस्टाइनविरुद्ध यस्तै आरोप लगाउने लगभग ५० नाबालिग केटीको पहिचान भयो । पाम बिच प्रहरी विभागले यो विषयलाई गम्भीरतापूर्वक लिएर धेरै महिनासम्म अनुसन्धान गर्‍यो । त्यसपछि एपस्टाइनविरुद्ध आपराधिक अनुसन्धान सुरु भयो ।

मुद्दाको अनुसन्धानबाट एपस्टाइनको म्यानहट्टन र पाम बिचमा विलासी भिल्ला रहेको पत्ता लाग्यो । एपस्टाइनले त्यहाँ हाइ-प्रोफाइल पार्टीहरू आयोजना गर्थे, जसमा धेरै ठूला सेलिब्रेटीहरू उपस्थित हुन्थे ।

एपस्टाइनले आफ्नो निजी जेट ‘लोलिता एक्सप्रेस’मा नाबालिग केटीहरूलाई पार्टीहरूमा ल्याउँथे । उनी युवतीहरूलाई पैसा र गहना दिने र धम्की दिएर जबरजस्ती गर्थे । एपस्टाइनकी प्रेमिका र पार्टनर घिसलेन म्याक्सवेलले यसमा उनलाई साथ दिएका थिए ।

यद्यपि, प्रारम्भिक अनुसन्धानपछि पनि एपस्टाइनले लामो समय जेलमा बिताउन परेन । उनको प्रभाव यति थियो कि सन् २००८ मा उनलाई केवल १३ महिनाको सजाय सुनाइएको थियो । जुन अवधिमा उनी दिनको समयमा जेलबाट बाहिर निस्केर काम गर्न सक्थे । विवादास्पद प्रावधानका आधारमा हरेक दिन १६ घन्टासम्म कामका लागि जेलबाहिर जान दिने व्यवस्था गरियो । राजनीतिक पहुँचकै कारण उनले त्यस्तो सहुलियत पाएका थिए ।

सन् २००९ मा जेलबाट बाहिर आएपछि एपस्टाइनले आफूलाई ‘लो प्रोफाइल’मा राखे । त्यसको ठीक आठ वर्षपछि अमेरिकामा ‘मी टू’ आन्दोलन सुरु भयो । सन् २०१७ मा अमेरिकी पत्रिका न्युयोर्क टाइम्सले हलिउड निर्माता हार्वे वाइन्स्टाइनले गरेका खराब कामहरूको विषयमा धेरै रिपोर्ट प्रकाशित गर्‍यो ।

वाइन्स्टाइनले दशकौंसम्म अभिनेत्री, मोडेल र कर्मचारीहरूको यौन शोषण गरेको रिपोर्ट आएको थियो । यो घटनाले विश्वभर सनसनी मच्चायो । करिब ८० भन्दा बढी महिलाले सामाजिक सञ्जालमा वाइन्स्टाइन विरुद्ध ‘मी टू’ आरोप लगाए ।

यसमा एन्जेलिना जोली, सलमा हायेक, उमा थर्मन र एश्ले जुडजस्ता ठूला नामहरू समेत थिए । त्यसपछि लाखौं महिलाहरूले सामाजिक सञ्जालमा ‘#MeToo’ लेखेर आफ्ना शोषणका कथाहरू सार्वजनिक गरे ।

भर्जिनिया ग्रिफी नामकी एक महिला पनि तीमध्ये थिइन् । जसले एपस्टाइनविरुद्ध धेरै गम्भीर आरोप लगाएकी थिइन् । उनले गरेको दाबीमा आफूमाथि ३ वर्षसम्म यौन दुर्व्यवहार भएको भनिएको थियो ।

भर्जिनिया ग्रिफीले डोनाल्ड ट्रम्पको क्लब मार-ए-लागोमा काम गर्दा आफू १६ वर्षकी भएको उल्लेख गरेकी थिइन् । त्यहीँ उनको घिसलेन म्याक्सवेलसँग भेट भएको थियो ।

म्याक्सवेलले उनलाई मसाज थेरापीको प्रस्ताव राखेको र त्यसपछि उनलाई एपस्टाइनको घरमा लगिएको उनले बताएकी थिइन् । जहाँ एपस्टाइन र म्याक्सवेलको लागि लगभग ३ वर्ष मसाजको काम गरेको उनको भनाइ छ ।

यस समयमा उनलाई निजी जेटहरूमा विश्वभरका ठाउँहरूमा पठाएर प्रभावशाली व्यक्तिहरूसँग ‘यौन सम्बन्ध’ राख्न बाध्य पारिएको उनको आरोप थियो ।

ग्रिफीले बेलायती शाही परिवारका राजकुमार एन्ड्रयुलाई आफू नाबालिग हुँदा जबरजस्ती गरेको आरोप पनि लगाएकी थिइन् । यो विषय बेलायती मिडियामा ठूलो विवादको विषय बनेको थियो । ग्रिफीले ट्रम्पबाट भने आफूमाथि दुर्व्यवहार भएको भनेर भनेकी छैनन् । तर, मार-ए-लागो क्लब —जहाँ उनलाई “भर्ती” गरिएको थियो, त्यो नै ट्रम्पको थियो ।

गिफ्रेको यस वर्ष अप्रिल २०२५ मा मृत्यु भयो । यसलाई आत्महत्या भनिएको छ । तर, यसले फेरि एकपटक यो मुद्दालाई बहसमा ल्याएको छ ।

जेलमै मृत्यु

एपस्टाइनविरुद्ध दबाब बढ्दै गइरहेको थियो । ६ जुलाई २०१९ मा एपस्टाइनलाई यौन बेचबिखनको गम्भीर आरोपमा न्युयोर्कमा फेरि पक्राउ गरियो । त्यसपछि २३ जुलाईमा उनी कोठरीमा बेहोस अवस्थामा फेला परेका थिए । उनको घाँटीमा निशानहरू थिए । कसैले उनलाई मार्ने प्रयास गरेको विश्वास गरिएको थियो ।

त्यसपछि उनको सुरक्षा व्यवस्था बढाइ पनि केही समयपछि हटाइएको थियो । १० अगस्ट २०१९ मा एपस्टाइन त्यही उच्च सुरक्षा जेलमा मृत फेला पारे । आधिकारिक प्रतिवेदनमा उनले झुण्डिएर आत्महत्या गरेको भनिएको थियो । तर धेरै चिकित्सा र कानुनी विज्ञहरूले यसमाथि प्रश्न उठाएका थिए ।

पोस्टमार्टम रिपोर्टमा एपस्टाइनको घाँटीको केही हड्डी भाँचिएको खुलेको थियो । यी चोटको प्रकृति सामान्य आत्महत्यासँग नभइ घाँटी थिचेर गरिने हत्या प्रयाससँग सम्बन्धित हुन्छन् । एपस्टाइनको मृत्यु भएको दिन उनी बसेको कोठा बाहिरका सुरक्षा क्यामेराहरूले काम गरिरहेका थिएनन् र फुटेज गायब भएको भनिएको थियो ।

एपस्टाइनको ग्राहक सूचीमा ठूला नामहरू समावेश भएकोले गोप्य कुरा पर्दाफास हुने डरले उनको हत्या गरिएको भनेर समेत चर्चा भएको थियो । एपस्टाइनको मृत्युपछि एफबीआई र न्याय विभागले यसको अनुसन्धान गरे । एपस्टाइनको मृत्युपछि उनकी प्रेमिका म्याक्सवेललाई सन् २०२० मा पक्राउ गरेर र सन् २०२२ मा यौन बेचबिखनको आरोपमा २० वर्षको जेल सजाय सुनाइएको थियो ।

अदालतका कागजातहरू, उडान लगहरू र पीडितहरू (जस्तै भर्जिनिया गिफ्रे) का बयानहरूले एपस्टाइनका ग्राहकहरूमा धेरै ठूला नामहरू समावेश भएको हुनसक्ने सम्भावना देखाएका थिए । केही कागजातहरू सन् २०१९, २०२४ र जनवरी २०२५ मा सार्वजनिक गरिएका थिए । जसमा बिल क्लिन्टन र प्रिन्स एन्ड्रयू जस्ता नामहरू प्रकाशमा आएका थिए । यद्यपि, उनीहरू विरुद्ध कुनै ठोस प्रमाण भने फेला परेन ।

विवाद

न्याय विभाग र एफबीआईमाथि एपस्टाइनको मृत्यु हुनुभन्दा अघि जानाजानी उनको सुरक्षा व्यवस्था कमजोर बनाएको आरोप छ । जेलका क्यामेराहरू किन बन्द थिए र गार्डहरू किन सुतिरहेका थिए भन्ने बारेमा अझै पनि कुनै स्पष्ट जवाफ आएको छैन । धेरै महत्त्वपूर्ण फाइल र प्रमाणहरू हराइरहेका छन् वा अझै सार्वजनिक गरिएका छैनन् ।

मिडिया र पीडित महिलाहरूले ‘ग्रान्ड जूरी’ कागजातहरू (जुन अझै गोप्य छन्) बाहिर ल्याउन माग गरेका छन् । एफबीआईले जानाजानी धेरै उच्च-प्रोफाइल नामहरूको अनुसन्धान नगरेको वा तिनीहरूलाई बचाउने प्रयास गरेको आरोप छ । तर, एफबीआईका प्रमुख काश पटेल र उपप्रमुख डयान बान्जिनोले उक्त सूची एफबीआईसँग सुरक्षित रहेकव भनेर दाबी गरेको छ । तर, सार्वजनिक गरेको छैन ।

एपस्टिनले आफ्ना शक्तिशाली ग्राहकको सूची नै बनाएर राखेका छन् भन्ने पनि ट्रम्पका समर्थकको दाबी थियो । त्यही सूची बाहिरिने डरले डेमोक्र्याटिक पार्टीका शक्तिशाली नेताले एपस्टिनको हत्या गरेको उनीहरू बताउँथे ।

भनिन्छ – एपस्टिनले आफ्ना शक्तिशाली ग्राहकको सूची नै बनाएर राखेका छन् । त्यही सूची बाहिरिने डरले डेमोक्र्याटिक पार्टीका शक्तिशाली नेताले एपस्टिनको हत्या गरेको केही व्यक्ति बताउँछन् ।

यस्तो आरोप लगाउनुमा तत्कालीन अमेरिकी राष्ट्रपति बिल क्लिन्टनसँग एपस्टिनको घनिष्ठ सम्बन्ध एउटा मुख्य कारण भएको समेत आरोप छ । सन् २००१ मा राष्ट्रपतिको कार्यकाल सकिएपछि क्लिन्टनले धेरैपटक एपस्टिनको निजी जहाजमा यात्रा गरेका थिए ।

यस्तै, यही वर्षको जुन ५ मा अर्बपति इलोन मस्कले ट्रम्पको नाम एपस्टाइन फाइलहरूमा रहेको र यही कारणले गर्दा फाइलहरू सार्वजनिक नगरिएको दाबी गरे । ट्रम्पले पदभार ग्रहण गर्दा एपस्टाइनका फाइलहरू सार्वजनिक गर्ने वाचा गरेका थिए । तर, अहिलेसम्म गरेका छैनन् ।

अहिले जब वाल स्ट्रिट जर्नलको रिपोर्ट बाहिर आयो, ट्रम्प फेरि विवादमा परे । ट्रम्पका समर्थकहरूले पनि उनीमाथि प्रश्न उठाइरहेका छन् । न्याय विभागले अब रिपोर्ट सार्वजनिक गर्ने बताएको छ । यद्यपि, यसको समय अझै खुलासा गरिएको छैन ।

(यो रिपोर्ट विभिन्न एजेन्सीको सहयोगमा तयार गरिएको हो।)