भारतीय माछा दिनहुँ भित्रिँदै

विशेष गरी काँकरभिट्टा, भद्रपुर, टाघनडुब्बा, सतीगट्टा, गौरीगञ्जलगायतका नाका हुँदै भारतबाट अवैधरुपमा माछा भित्रिने गरेको छ । पछिल्लो समय भारतबाट नेपाल भित्र्याइएको माछा सशस्त्र प्रहरी वेस शनिश्चरेले बरामद गर्दै नष्ट गरेको छ । बिर्तामोड–१ मेघावारीबाट सशस्त्र प्रहरीले अवैध रुपमा ल्याइएको माछा बरामद गर्दै नष्ट गरेको हो ।

नेपाल भित्रिने माछा प्लान्ट क्वारेन्टाइनमा परीक्षणपछि मात्र भित्र्याउनुपर्ने प्रावधान छ । भित्र्याइएको माछा खानयोग्य भए नभएको प्रमाणपछि मात्र बिक्री वितरण गरिनुपर्ने भए पनि झोले व्यापारीले खुलेआम रुपमा माछा भित्र्याउँदै आएका छन् ।

कतिपय माछा व्यवसायीले अवैधरुपमा भित्रिने गरेको माछा रोक्न माग गर्दै आए पनि अधिकांश नाकाबाट खुलेआम रुपमा माछा भित्रिने गरेको छ । अवैधरुपमा भित्रिएका माछाका कारण बजार समेत प्रभावित हुने गरेको माछा व्यवसायीहरुको भनाइ छ ।

भन्सार गरेर ल्याइएको माछा महंगो मूल्यमा बेच्नुपर्ने हाम्रो बाध्यता छ– बिर्तामोडका माछा व्यवसायी संघमा आबद्ध एक व्यवसायी भन्छन्– परीक्षण बिना र भन्सार नगरी ल्याइएको माछाले यहाँको बजार बिगारेको छ । यस्ता माछा रोक्न प्रशासन सक्रिय रुपमा लाग्नुपर्छ ।

सशस्त्र प्रहरी बल वेसका अमरबहादुर भुजेलको नेतृत्वमा गएको सशस्त्र प्रहरीको टोलीले माछा बरामद गरेको र पशु क्वारेन्टाइन कार्यालयका प्रतिनिधि, प्रहरी, स्थानीय जनप्रतिनिधि, पत्रकारको रोहवरमा नष्ट गरिएको थियो ।