हिमपहिरामा हराएका चिनियाँ पर्यटकको शव १३ दिनपछि भेटियो

काठमाडौँ।

पदयात्राका क्रममा कास्कीको अन्नपूर्ण गाउँपालिका–११ देउरालीस्थित चुमरुङमा हिमपहिरोमा परी बेपत्ता भएका २८ वर्षीय चिनियाँ नागरिक ई–चेङ युआनको १३ दिनपछि आज शव फेला परेको छ ।

सशस्त्र प्रहरी बल कालिका गण पोखराको विशेष विपद् उद्धार टोलीले आज बिहान देउराली चुमरुङस्थित मोदी नदी किनारबाट २० मिटर उत्तरतर्फ उनको शव फेला पारेको सशस्त्र प्रहरी नायव उपरीक्षक एवं सहायक प्रवक्ता शैलेन्द्र थापाले जानकारी दिए ।

प्रहरीका अनुसार उनको शव पोखरा ल्याउने तयारी भइरहेको छ ।

अन्नपूर्ण आधार शिविर(एविसी) को पदयात्रा सकेर घान्द्रुकतर्फ फर्कने क्रममा पर्यटक बेपत्ता भएपछि उनको खोजीमा प्रहरी टोली खटिएको थियो ।

यही चैत ११ गते दिउँसो कास्कीको अन्नपूर्ण गाउँपालिका–११ देउरालीस्थित चुमरुङमा हिमपहिरो गएको थियो । बेसक्याम्पबाट फर्केका भारतीय पर्यटकले देउरालीमा गएको हिमपहिरामा एक जना पुरिएको सूचना प्रहरीलाई दिएका थिए ।

त्यसैगरी तनहुँको आबुखैरेनी गाउँपालिका–१ बरादीस्थित मस्र्याङ्दी नदीमा शुक्रबार बेपत्ता भएका युवकको खोजीकार्य भईरहेको प्रहरीले बताएको छ।
जिल्लाको शुक्लागण्डकी नगरपालिका–५ बस्ने अन्दाजी २० वर्षिय आशिष राना शुक्रबार नदीमा डुवेर बेपत्ता भएको बताईएको छ ।

बेपत्ता आशिष रानाको खोजीकार्यको लागि सशस्त्र प्रहरी बल नेपाल विपद् व्यवस्थापन तालिम शिक्षालय कुरिनटारबाट गोताखोर र नं. २३ मनकामना गण तनहुँबाट सशस्त्र प्रहरी निरीक्षकको कमाण्डमा सुरक्षा फौज परिचालन भएको प्रहरीले जनाएको छ।