‘नइ देरुनीख अन्तर्राष्ट्रिय पुरस्कार’ मोहन सिटौलालाई

काठमाडौं । नइ प्रकाशनले २०७८ सालको ‘नइ देरुनीख अन्तर्राष्ट्रिय पुरस्कार’ नेपाली वाङमयको श्रीवृद्धिका लागि सिर्जना र सङ्गठनमार्फत निरन्तर जागरूक र समर्पित हुँदै नेपाली भाषा साहित्यको अन्तर्राष्ट्रिय विस्तारमा महत्त्वपूर्ण योगदान पुर्याउने अमर प्राज्ञ अमेरिकामा बसोबास गर्दै आएका प्रा मोहन सिटौलालाई दिने भएको छ । 

प्रकाशनका सदस्यसचिव नरेन्द्रराज प्रसाईले सिटौलालाई नेपाली साहित्यसँगै डायस्पोरा साहित्यमा पुर्याएको योगदानको कदर गर्दै सिटौलालाई ताम्रपत्रका साथ दुई लाख रुपैयाँ पुरस्कारसमेत अर्पण गर्ने निर्णय भएको बताएका छन् । 

साहित्यकार मोहन सिटौलाको ‘सिद्धिसुधा’ महाकाव्य राष्ट्रपति भण्डारीद्वारा  विमोचन 
करिब एक दर्जन पुस्तक प्रकाशित गरेका सिटौलाले नेपाली शिक्षा क्षेत्रमा ठूलो योगदान दिएका छन् । पूर्वमा थुप्रै विद्यालय र क्याम्पस खोल्न अहम् भूमिका खेलेका सिटौलाले साहित्यमा पनि उत्तिकै योगदान दिएका छन् । 

महाकवि देवकोटा पुरस्कार २०७६ बाट  मोहन सिटौला सम्मानित
यसैगरी नइ प्रकाशनले समालोचना, कविता, निबन्ध, नाटक, अनुवाद आदि सिर्जनाद्वारा नेपाली भाषासाहित्यको श्रीवृद्धिका लागि महत्त्वपूर्ण योगदान पुर्याउने  भारत असमका छविलाल उपाध्यायलाई ‘नइ गणेश दुर्गा अन्तर्राष्ट्रिय पुरस्कार’ दिने निर्णय गरेको छ ।

ताम्रपत्रका साथ यस पुरस्कारको राशि एक लाख रुपैयाँ रहेको प्रसाईले जानकारी दिए । यी दुवै पुरस्कार अन्तरार्ष्ट्रिय क्षेत्रमा ख्याति कमाएकामध्ये एक जना विशिष्ठ नेपाली गोर्खाली मूलका विदेशी व्यक्तित्वलाई हरेक वर्ष नइले दिँदै आएको छ । 

नइ प्रकाशनकी अध्यक्ष ईन्दिरा प्रसाईको अध्यक्षतामा बसेको प्रकाशनको बैठकले सो निर्णय गरेको हो । पुरस्कार आगामी असार १८ गते काठमाडौंमा विशेष कार्यक्रम गरी प्रा सिटौला र उपाध्यायलाई दिइने प्रसाईले जानकारी दिए । 

नईले विभिन्न ३० विधामा पुरस्कार प्रदान गर्दै आइरहेको छ ।