जोन्टा, एनसेल फाउन्डेसन, युएनएफपिए र युनिसेफ नेपालबीच लैंगिक हिंसाविरुद्ध सहकार्य

काठमाडौं । जोन्टा, एनसेल फाउन्डेसन, युएनएफपिए र युनिसेफ नेपालबीच लैंगिक हिंसाविरुद्ध १६ दिने अभियानका लागि सहकार्य भएको छ ।

विश्वभर मनाइने लैंगिक हिंसाविरुद्धको १६ दिने अभियानको अवसरमा, जोन्टा, एनसेल फाउन्डेसन, युएनएफपीए, र युनिसेफ नेपालले बालविवाह अन्त्यको लागि जनसचेतना जगाउन र संयुक्त पहलद्वारा यसको समाधान खोज्न योगदान पुर्‍याउने उद्देश्यले महिलाविरुद्धको हिंसा उन्मुलनका लागि अन्तर्राष्ट्रिय दिवसको अवसरमा एक विशेष कार्यक्रम आयोजना गरेको हो ।

कार्यक्रममा महिला नेतृत्वमा रहेका संस्थाहरू, निजी क्षेत्रका प्रतिनिधिहरू र विभिन्न सरोकारवालाहरूले बालविवाह अन्त्यका समाधानबारे छलफल गरे । कार्यक्रमको उद्घाटन जोन्टाका अध्यक्ष बिना रानाले गरिन् । उनले बालविवाह रोक्न सबै पक्षको सहकार्य अपरिहार्य रहेकोमा जोड दिइन् ।

युनिसेफ नेपालकी डेपुटी रिप्रेजेन्टेटिभ टु नेपाल जी ह्युन राह, युएनएफपिए नेपालकी लैंगिक तथा मानव अधिकार विशेषज्ञ, कमला विष्ट, कलाकार प्रकाश सपुत, र एसडिजी स्टुडियोले ‘शिरमै फुर्के रिबन’ शीर्षकको संगीत भिडिओ सार्वजनिक गरे ।

यो भिडियो किशोर किशोरीहरूलाई बालविवाहका असरबारे सचेत गराउन युएनएफपिए र युनिसेफ नेपालले संयुक्त रूपमा बनाएका हुन् ।

एनसेलकी हेड अफ कर्पोरेट कम्युनिकेसन एन्ड सिएसआर, विशाखा लक्ष्मी खड्काले भनिन्, ‘हामी लैंगिक हिंसाको अन्त्य गर्नु केवल सामाजिक आवश्यकता मात्र नभई सबैको नैतिक जिम्मेवारी पनि हो भन्ने विश्वास राख्छौं । यस किसिमको विभिन्न क्षेत्रको साझेदारीहरूको माध्यमबाट हामी यस सामूहिक प्रयासलाई प्रोत्साहन गर्न, समुदायलाई सशक्त बनाउन सक्ने वातावरण निर्माणतर्फ काम गर्न चाहन्छौं ।’