बैंकको सफ्टवेयर बनाउने कम्पनीकै खाताबाट साढे ३ करोड ‘चोरी’, २४ जनाविरूद्ध मुद्दा दर्ता

काठमाडौं । सफ्टवेयर तथा प्रविधि विकासमा काम गर्ने ‘एफवान सफ्ट कम्पनी’को बैङ्क खाताबाट ह्याकरले तीन करोड ४२ लाख रुपैयाँ चोरी गरेको घटनामा २४ जनाविरूद्ध मुद्दा दायर भएको छ ।

कम्पनीको सिटिजन्स् बैङ्कको खातामा रहेको रकम अनलाइन बैङ्किङ प्रणाली ह्याकिङ गरी पैसा चोरी भएको घटनामा जिल्ला अदालत काठमाडौंमा मुद्दा दायर भएको हो ।

जिल्ला सरकारी वकिलको कार्यालय काठमाडौंले बिहीबार २४ जनालाई प्रतिवादी बनाएर जिल्ला मुद्दा दायर गरेको छ । अहिले ९ जना मात्रै प्रहरीको नियन्त्रणमा छन् । १५ जना फरार छन् ।

पक्राउ पर्नेमा ललितपुरका ४० वर्षीय त्रिगुण रत्न बज्राचार्य, सिराहाका २० वर्षीय राहुल ठाकुर, १९ वर्षीय पुरुषोत्तम साह, सप्तरीका २१ वर्षीय कृष्ण रमण राउत, ३१ वर्षीय सञ्जीव कुमार शर्मा र उदयपुरका कमल थापा मगर छन् ।

त्यस्तै, उदयपुरकै दीपक थापा मगर, सुनसरीका २४ वर्षीय सन्देश राई र सुनसरीकै सागरकुमार साहलाई प्रतिवादी बनाइएको हो । उनीहरूमध्ये केहीबाहेक १८ देखि २४ वर्ष उमेर समूहका छन् ।

एफ–वान इन्टरनेशनल प्रालि कम्पनीबाट कसैको जानकारीबिना गत अक्टोबर १ देखि अक्टोबर ४ सम्म पटक–पटक गरी ३ करोड ५१ लाख ५० हजार ३७२ रुपैयाँ ९० पैसा झिकिएको थियो ।

‘अनधिकृत’ रूपमा खाताबाट निकालिएको भन्दै गत असोज २० गते कम्पनीको तर्फबाट धिरजकुमार भुजेलले जाहेरी दिएका थिए । सरकारी वकिलको अभियोग पत्रमा कसरी अनधिकृत रूपमा पहुँच पुर्‍याएर रकम झिकिएको भन्ने खुलेको छैन ।

सन् २०२४ अक्टोबर १, २, ३, र ४ तारिखमा एफ–वान इन्टरनेशनल प्रालि कम्पनीको खाताबाट विभिन्न व्यक्तिहरूको खातामा पैसा रकमान्तर भएको थियो ।

‘राहुल ठाकुरसमेतका विपक्षीहरूको खातामा रकमान्तर गरी निजहरूले रकम झिकिलिएको हुँदा निजहरूलाई कानूनबमोजिम कारबाही गरी रकमान्तर गरिलिएको सम्पूर्ण रकमसमेत निज विपक्षीहरूबाट दिलाई भराइपाउँ’, कम्पनीले दिएको उजुरीमा उल्लेख छ ।

कम्पनीको खाताबाट चोरी भएको पैसा नेपालमै विभिन्न व्यक्तिको खातामा लगेको देखिएको छ । एफवान सफ्टले फोन पे र ईसेवा जस्ता वालेट तथा डिजिटल भुक्तानी सञ्चालन गर्दै आएको छ ।

अहिले प्रतिवादी बनाइएकाहरूको पनि रकम ट्रान्सफर गर्नका लागि खाता प्रयोग भएको देखिएको उनले प्रारम्भिक अनुसन्धानबाट खुलेको छ । उनीहरू १२ कक्षा पढ्ने विद्यार्थीदेखि पसलमा काम गर्नेसम्मका छन् ।

‘अहिले पक्राउ परेका प्रविधिबारे धेरै ज्ञान भएका व्यक्ति छैनन् । उनीहरूको नागरिकता दुरुपयोग गरेर बैङ्क खाता खोलेर ह्याकरले पैसा झिकेको हुनसक्ने देखिन्छ,’ अनुसन्धानमा संलग्न एक अधिकारी बताउँछन् ।

कर्पोरेट बैङ्किङ प्रणालीमा अनधिकृत रूपमा पहुँच पुर्‍याएर खाताबाट रकम चोरी भएको घटना सम्भवत: पहिलो हो । बैङ्क खाता कसरी ह्याकिङ भयो भन्नेमा प्रहरी, बैङ्क तथा सो कम्पनीका अधिकारी तीन महिनासम्म अन्योलमा छन् ।

यस्तो खालको बैङ्किङ ह्याकिङ नयाँ खालको भएकाले समग्र बैङ्किङ क्षेत्रकै लागि समेत चुनौती बनेको छ । ह्याकिङ कसरी भयो भन्नेमा अझै पत्ता लगाउन नसकिएको प्रहरी स्रोत बताउँछ ।

प्रतिवादी बनाइएका राहुल ठाकुर गोलबजार-१० डण्डाटोलमा फलामको औजार बनाउने पसलमा काम गर्छन् । तीन महिनाअघि उनलाई आफ्ना साथी पुरुषोत्तमले बैङ्क खाता नम्बर मागेको बयान दिएका छन् ।

पुरुषोत्तमले भनेपछि उनले बैङ्क खाता र मोबाइल बैङ्किङ खोलेका थिए । मोबाइल बैङ्किङ खाता भने पुरुषोत्तमले दिएको नम्बरअनुसार चलाएका थिए । त्यसरी नै अरू दुई वटा खाता खोल्न लगाएर प्रयोग गर्न दिएको अभियोग पत्रमा उल्लेख छ ।

राहुलले प्रहरीलाई दिएको बयानमा आफूले कुनै रकम नपाएको भनेका छन् । तर उनको खातामा पटक–पटक गरी आठ लाख ४५ रुपैयाँ जम्मा भएको अनुसन्धानमा देखिएको हो ।

पुरुषोत्तमले पनि प्रहरीलाई दिएको बयानमा आफ्ना अर्का साथी अविनाशले सेयर कारोबार गर्नका लागि बैङ्क खाता चाहिएको भन्दै माग गरेको बताएका छन् । अविनाश भने फरार छन् । पुरुषोत्तम भने कक्षा १२ मा पढिरहेका विद्यार्थी हुन् ।

अन्यलाई भने जागिर दिने प्रलोभनमा पारेको पनि देखिएको छ । जागिरकै नाममा बैङ्क खाता प्रयोग गरी एकबाट अर्को खातामा रकमान्तर गरेको देखिएको हो ।

उनीहरूमाथि मुलुकी अपराधसंहिता २०७४ अनुसार ठगी गर्न नहुने कसुरमा सजायको मागदाबी गरेको छ ।

प्रतिवादीमध्ये एक राहुल ठाकुरको बयान

अर्का प्रतिवादी पुरुषोत्तम साहको बयान