सभापति कप : फ्रेन्ड्स क्लबलाई हराउँदै एनआरटी सेमिफाइनलमा (तस्वीरहरु)

काठमाडौं। नेपाली कांग्रेस लोकतान्त्रिक खेलकुद संघ महाधिवेशन निर्देशन समितिको आयोजनामा दशरथ रंगशालामा जारी सभापति कप फुटबल प्रतियोगिता २०८१ अन्तर्गत आइतबार भएको खेलमा न्यूरोड टिम (एनआरटी) विजयी भएको छ।

प्रतिद्वन्द्वी फ्रेन्ड्स क्लबलाई १ को विरुद्ध ३ गोल हान्दै एनआरटी विजयी भएको हो। यो जीत संगै सेमिफाइनलको समिकरण पूरा भएको छ।

एनआरटी संगै सेमिफाइनलको लागी सङ्कटा, मच्छिन्द्र र आयोजक बागमतीले आफ्नो स्थान सुरक्षित बनाइसकेका छन्।

पहिलो हाफको १८ र २३ मिनेटमा एनआरटीको तर्फबाट जर्सी नम्बर १४ का क्याप्टेन अञ्जन बिष्टले गोल गर्दै सुखद सुरुवात गरे।

यसैगरी दोस्रो हाफको १ मिनेटमै जर्सी नम्बर ११ का रिकार्ड विल्सनले गोल गर्दै टिमलाई ३-० को अग्रता दिलाए।

फ्रेन्ड्सको तर्फबाट दोस्रो हाफको ८० मिनेटमा जर्सी नम्बर ११ का क्याप्टेन विवेक पौडेलले सान्त्वना गोल गरे। प्रतियोगिताको प्लेयर अफ द म्याच एनआरटीका अञ्जन बिष्ट भएका छन्।

एनआरटीले फाइनल प्रवेशका लागि मंगलबार आयोजक बागमतीसंग खेल्ने छ। यसैगरी सोमबार हुने पहिलो सेमिफाइनलमा सङ्कटा र मच्छिन्द्र आमने सामने हुने छन्।

सर्वाधिक पुरस्कार राशि भएको यस प्रतियोगिताको विजेताले नगद २६ लाख र उप विजेताले नगद १३ लाख पाउनेछन्।