ट्रम्पले इरान-इजरायल द्वन्द्व सम्बन्धी जी-७ को संयुक्त वक्तव्यमा हस्ताक्षर नगर्ने

काठमाडौं । अमेरिकी राष्ट्रपति डोनाल्ड ट्रम्पले इरान-इजरायल द्वन्द्व सम्बन्धी जी-७ को संयुक्त वक्तव्यमा हस्ताक्षर नगर्ने भएका छन् । संयुक्त वक्तव्यको मस्यौदामा तनाव कम गर्न, इरानको निगरानी गर्न र दुवै पक्षलाई नागरिकको सुरक्षा गर्न आग्रह गरिएको छ।

ह्वाइट हाउसका एक अधिकारीले अन्तर्राष्ट्रिय सञ्चारमाध्यम एनबीसीलाई बताए अनुसार,  ट्रम्पको  नेतृत्वमा अमेरिका फेरि विश्वमा शान्ति स्थापना गर्ने प्रयासको अगुवाइ गरिरहेको छ । अमेरिका इरानले कुनै पनि हालतमा आणविक हतियार प्राप्त गर्न नपाओस् भन्ने चाहान्छ ।

ट्रम्प मध्यपूर्वको स्थितिलाई मध्यनजर  गर्दै जी-७ (G7) बैठक छोट्याएर मङ्गलबार राति वाशिंगटन फर्कने ह्वाइट हाउसले जनाएको छ। ट्रम्प र बेलायतका सर कियर स्टारमरबीच जी-७ शिखर सम्मेलनका क्रममा अमेरिका र बेलायतबीच ट्यारिफ सम्झौतामा हस्ताक्षर भएसँगै उनी वाशिंगटन फर्कन लागेको बीबीसीले जनाएको छ ।

यसअघि, अमेरिकी राष्ट्रपति ट्रम्पले २०१४ मा रुसी राष्ट्रपति भ्लादिमिर पुटिनलाई तत्कालीन जी-८ (G8) बाट निष्कासन गर्नु गल्ती भएको बताएका थिए।