अमेरिकी हमलाले आणविक कार्यक्रममा कुनै असर पारेको छैन : इरानी सर्वोच्च नेता

काठमाडौं । इजरायलसँगको युद्धविराममा सहमति भएपछि इरानका सर्वोच्च नेता आयतुल्लाह अली खामेनेई अमेरिकी हमलाले इरानको आणविक कार्यक्रमलाई  कुनै  असर नपारेको  बताएका छन् ।

जुन १३ मा इजरायलसँग प्रत्यक्ष द्वन्द्व सुरु भएपछि सार्वजनिक रूपमा देखा नपरेका खामेनीले बिहीबार बिहान टेलिभिजनमा सम्बोधन गर्दै यस्तो बताएको बीबीसीले जनाएको छ ।

उनले आफ्नो पहिलो सार्वजनिक  सम्बोधनमा संयुक्त राज्य अमेरिकाले इरानको आणविक प्रतिष्ठानहरूमा गरेको आक्रमणबाट “कुनै उपलब्धि हासिल नगरेको” दाबी  गरे ।

अमेरिकी रक्षामन्त्री पीट हेगसेथले हमलाले इरानको आणविक महत्वाकांक्षालाई “वर्षौं पछि धकेलेको” र “महत्वपूर्ण क्षति पुर्‍याएको”  दाबी गरेको बेला खामनेईको यस्तो प्रतिक्रिया आएको हो ।

बीबीसीका अनुसार  इरानी अधिकारीहरूले खामेनेईले बिहीबार कहाँबाट सम्बोधन गरेका थिए भन्ने कुरा खुलाएका छैनन् ।  उनले कतारस्थित अमेरिकी हवाई अड्डामा भएको जवाफी हमलालाई भने “ठूलो धक्का” को रूपमा व्याख्या गरे ।

उनले  भिडियो सम्बोधनमा इरानमाथि फेरि आक्रमण भएमा मध्यपूर्वमा अमेरिकी सैन्य आधारहरूमा थप हमला गर्ने धम्की दिए र इजरायल र अमेरिका दुवैमाथि विजय घोषणा गरे। उनले ट्रम्पले आणविक स्थल आक्रमणको प्रभावलाई “बढाइचढाइ” गरेको बताए।

“उनीहरूले केही गर्न सकेनन् र आफ्नो उद्देश्य हासिल गर्न सकेनन्,” खामेनेईले  कतारस्थित अमेरिकी हवाई अड्डामा भएको आक्रमणको सन्दर्भमा भने, “यो घटना भविष्यमा पनि दोहोरिन सक्छ, र कुनै पनि आक्रमण भएमा दुश्मन र आक्रमणकारीका लागि लागत निस्सन्देह धेरै उच्च हुनेछ।”

अमेरिकी राष्ट्रपति डोनाल्ड ट्रम्पले यसअघि इरानका तीन प्रमुख आणविक स्थलहरूमा भएका हमलाले तिनीहरूलाई “पूर्ण रूपमा ध्वस्त” पारेको बताएका थिए। यद्यपि, अमेरिकी अधिकारीहरूले क्षतिको मात्रा कम भएको हुन सक्ने रिपोर्ट आएपछि उनले आक्रोश व्यक्त गरेका थिए।

पेन्टागनमा बिहीबार बिहान आयोजित पत्रकार सम्मेलनमा हेगसेथले यो अभियान “ऐतिहासिक सफलता” भएको र यसले इरानी युरेनियम संवर्धन सुविधाहरूलाई “अयोग्य” बनाएको बताएका थिए। उनले फोर्डोबाट आक्रमण अघि समृद्ध युरेनियम सारिएको कुनै गुप्तचर जानकारी नभएको बताए।

आक्रमणमा कोही पनि हताहत भएनन् र ट्रम्पले सो आक्रमण सुरु हुनुअघि नै जानकारी दिइएको बताएका थिए। अमेरिकाले उक्त आधारमा कुनै क्षति नभएको बताएको छ।