पटनाको पारस अस्पतालमा कैदीको गोली हानी हत्या, सुरक्षा व्यवस्थामाथि प्रश्न

पटना, बिहार।

राजधानी पटनास्थित पारस अस्पतालमा मंगलबार एक दर्दनाक घटना घटेको छ। अस्पतालमा उपचाररत एक कैदीमाथि अस्पतालभित्रै प्रवेश गरेर अज्ञात व्यक्तिहरूले गोली प्रहार गरी हत्या गरेका छन्।

घटनामा मारिएका व्यक्ति बक्सर जिल्लाका चन्दन मिश्र हुन्, जो हाल बेउर जेलमा बन्दी थिए र प्यारोलमा बाहिरिएर उपचार गराइरहेका थिए। उनीमाथि केशरी नामक व्यक्तिको हत्या गरेको आरोप थियो।

घटनास्थलमा पुगेका पटना एसएसपी कार्तिकेय शर्माले पत्रकारहरूसँग कुरा गर्दै भने, “पोस्टमार्टमपछि कति राउन्ड गोली प्रहार भयो भन्ने खुल्नेछ। हालसम्म प्राप्त प्रारम्भिक जानकारी अनुसार कैदी चन्दन मिश्रमाथि उनका विपक्षी समूहका व्यक्तिहरूले अस्पतालभित्रै प्रवेश गरी हमला गरेका थिए।”

प्रत्यक्षदर्शीको भनाइ

पारस अस्पतालमा आफ्नो परिवारको उपचार गराइरहेका अमित कुमार नाम गरेका व्यक्तिले भने, “हामी अस्पताल बाहिर थियौं। केही मानिसहरू अचानक भित्र पसे। केही समयमै गोली चलेको आवाज आयो। त्यसपछि निकै हंगामा भयो। प्रहरी र मिडिया केहीबेरमै घटनास्थलमा आए।”

घटनापछि राजद नेता तथा पूर्व उपमुख्यमन्त्री तेजस्वी यादवले सामाजिक सञ्जाल ‘X’ (पूर्व ट्विटर) मा लेखेका छन्।

“सरकारी संरक्षणमा रहेका अपराधीहरू आईसीयू भित्र पसेर एक बिरामी कैदीको हत्या गर्छन्। अब बिहारमा को सुरक्षित छ? के यस्तो अवस्था 2005 अघि पनि थियो?”

विपक्षी दलहरूले राज्य सरकारमाथि कानुन-व्यवस्था धराशायी भएको आरोप लगाउँदै आलोचना तीव्र पारेका छन्। केही दिनअघि पटनाका व्यवसायी गोपाल खेमकाको पनि गान्धी मैदान नजिकै हत्या भएको घटनाले राजधानीमा सुरक्षा स्थितिप्रति गम्भीर प्रश्न उठाएको छ।

प्रशासनको चुनौती
यो घटनाले अस्पताल जस्तो संवेदनशील स्थानमा समेत सुरक्षा व्यवस्था कमजोर भएको संकेत गरेको छ। अस्पताल प्रशासन, प्रहरी प्रशासन र राज्य सरकार यस घटनाको छानबिनमा जुटेको जनाइएको छ। बीबीसी