गाजामा क्रेन खस्दा दुई इजरायली सैनिकको मृत्यु, आठ जना घाइते

जेरुसेलम । गाजा पट्टीमा बुधबार राति सेनाको क्रेन खस्दा दुई इजरायली सैनिकको मृत्यु हुनुका साथै अन्य आठजना घाइते भएको इजरायली रक्षा बल (आईडीएफ)ले जनाएका छन् ।

इजरायलको सरकारी स्वामित्वको कान टीभी न्युजले क्रेन आईडीएफको गोलानी ब्रिगेडका सैनिकहरूको पालमा खसेको जनाएको छ । घाइतेमध्ये एकको अवस्था चिन्ताजनक रहेको बताइएको छ ।

उक्त घटना गाजा सीमा नजिकैको आईडीएफ कम्पाउन्डभित्र भएको बताएको छ, जहाँ आईडीएफ बलहरूले वर्तमान युद्धविरामको बाबजुद मिसनहरू सञ्चालन गरिरहेका छन् ।

कान टीभीका अनुसार सेनाहरूले आँधीबेहरीमा क्रेनको प्रयोग गर्दछ । आईडीएफले घटनाको विस्तृत अनुसन्धान सुरु गरेको छ ।