च्याम्पियन्स ट्रफीमा कोहलीको तीन ‘भाइरल डान्स मुभ्स’

काठमाडौं । आईसीसी च्याम्पियन्स ट्रफीको उपाधि भारतीय क्रिकेट टोलीले जित्यो । गत  आइतबार न्युजिल्याण्डलाई ४ विकेटले पराजित गर्दै उपाधि भारतले जितेको हो ।

जितपछि हरेक क्रिकेट टोलीको सेलिब्रेसन स्टाइल फरक हुनेगर्छ । स्याम्पेन खोल्ने, स्टेडियम घुमेर समर्थकलाई धन्यवाद दिने, राष्ट्रिय झण्डा फहराउने तथा विभिन्न गीत घन्काएर नाच्नेजस्ता क्षणहरु जित मनाउने केही तरिका हुन् ।

केही खेलाडीले आफ्नो पृथक शैलीमा पनि जितलाई मनाउने गर्छन् । त्यस्तै खेलाडीको सूचीमा पर्छन्, भारतीय क्रिकेटर विराट कोहली (Virat Kohli)। कहिले खेल्दै गर्दा त कहिले खेलकै क्रममा कोहली नाच्ने गर्छन् ।

एसिया कपको दौरान नेपालविरुद्धको खेलमा नेपाली गीत ‘कुटुमा कुटु’ गीतमा कोहलीले कम्मर हलाउँदा, त्यो डान्स सामाजिक सञ्जालमा भाइरल नै भएको थियो । कोहलीको जितपछिको नृत्य सधैँ यादगार हुने गर्दछ ।

यसपटक पनि टुर्नामेन्ट सकिएपनि भारतका कोहलीको सेलिब्रेसनको डान्स मुभ्स अझै पनि चर्चामा छ । कोहलीले ट्रफी उचालेपछि नृत्यको साथ सेलिब्रेसन गरेको यो पहिलो पटक भने पक्कै होइन ।

सन् २०१३ मा पनि भारतले ट्रफी उचाल्दा विराटको डान्स मुभ्सले सेलिब्रेट गरेका थिए । त्यस सेलिब्रेसनदेखि सन् २०२५ को ट्रफी उचाल्दासम्म उनले मैदानमा ३ फरक डान्स मुभ्सका साथ सेलिब्रेसन गरेका छन् । जुन यसप्रकार रहेका छन् ।

गङ्नाम स्टाइल

सन् २०१३ मा भएको च्याम्पियन्स ट्रफीको उपाधि भारतले जितेको थियो । महेन्द्र सिंह धोनीको कप्तानीमा रहेको टोलीमा कोहली पनि थिए । बर्मिङ्घमको एजबास्टन इनमा भएको फाइनल खेलमा भारतले इङ्ल्याण्डलाई ५ रनले हराएको थियो । भारतका लागि त्यो दोस्रो च्याम्पियन्स ट्रफी थियो ।

त्यसबेला पनि कोहलीको डान्स चर्चाको शिखरमा नै रह्यो । ग्रुप फोटो खिच्न बेला उफ्रँदै कोहली अगाडि जान्छन् र एक्कासी हिपहपमा प्रसिद्ध फ्लोर वर्कको रुपमा चिनिने ‘वर्म वेभ’ वा ‘क्याटरपिलर स्टेप’ (Worm Wave) पनि गर्न थाल्छन् । दुईपटक यो क्याटरपिलर स्टेप गरेपछि कोहलीले स्टेप चेन्ज गरेका थिए ।

सन् २०१२ मा आएको कोरियन पप के–पप सिङ्गर तथा र्यापरको प्रसिद्ध गीत गङ्नाम स्टाइल (Gangn am Style)को हुक स्टेप देखाएर विराटले च्याम्पियन्स ट्रफीको जितको सेलिब्रेसन गरेका थिए । त्यो बेलाको निमै भाइरल डान्स मुभलाई कोहलीले आफ्नो शैलीमा प्रस्तुत गर्दा मैदानमा चार चान्द लागेको थियो ।

त्यो मुभलगत्तै उनले पुसअप पनि हानेका थिए । उनले आफ्नो सो स्टेपलाई ग्रुप फोटोमा मात्र सिमित राखेनन् । तर,समर्थकलाई धन्यवाद दिँदा पनि ह्वाइट ज्याकेट लगाएका कोहली मैदान घुम्ने क्रममा पनि पटक पटक सोही शैलीमा नाचेका थिए ।

भाङ्ग्रा

भारतीय क्रिकेट टोलीका पूर्व कप्तानसमेत रहेका कोहलीले भाङ्ग्रा (Bhangra) स्टेपको पनि प्रदर्शन गरे । पन्जाबको क्षेत्रसँग नाता भएको विराटले भाङ्ग्रा नाच्न पनि दुरुस्तै नाचेका थिए ।

फाइनलमा न्युजिल्याण्डविरुद्ध खेलमा विकेटकिपर–ब्याट्सम्यान टम लेथमलाई रविन्द्र जडेजाले आउट गर्दा विराटले भाङ्ग्रा पनि नाचेका थिए । विकेटलगत्तै क्यामेरा विराटाको सेलिब्रेसनतर्फ मोडिएको थियो । भारतीय दर्शकले त्यसलाई दुरुस्तै मन पराए । साथै, त्यो क्षण सामाजिक सञ्जालमा पनि निकै भाइरल भएको थियो ।

उनको सेलिब्रेसनमा भारतको पूर्व क्रिकेटर हरभजन सिंहले पनि मन पराएका थिए । उनले भनेका थिए – ‘कोहली मुडमा छन् पूरै । वाहवाह । कुम पनि हलाइरहेका छन् । भङ्ग्रा पनि गरे । क्रिकेट इन्जोइ गरिरहेका छन्। ’

खेलसकेपछि पनि उनले स्टम्प हातमा लिएर मैदानमा भाङ्ग्रा नाचेका थिए । स्टम्पलाई टाउकोमाथि दुई हातले समातेर भाङ्ग्रा नाच्दै कोहली अगाडी बढेको दृश्य निकै रोचक बनेको थियो ।

डान्डिया

रविन्द्र जडेजाले विनिङ शट खेलेलगत्तै भारतीय टोलीमा उत्साहको लहर छायो । विराटले खेले जितेलगत्तै गौतम गम्भीरलाई अङ्कमाल पनि गरे । विराट जस्तै अन्य भारतीय खेलाडीले पनि भङ्ग्रा नाचे ।

स्टम्प हातमा लिएर कोहलीले रोहीत शर्मासँग डान्डिया पनि खेले । दुवै स्टम्पलाई यति मजाले तालसँग ताल मिलाएर ठोक्याउँदै थिए कि मानौँ गुजरातमा खेलिने डान्डिया रास र गब्रा दुबईमा छायो ।

यद्यपि, कोहलीको डान्स क्रिकेट मैदानमा मात्र सिमित रहँदैनन् । बेलाबखतमा विभिन्न कार्यक्रममा क्रिश गेलदेखि डान्सको गड प्रभु देवासँग बलिउड गानामा नाचेर ब्याटले मात्र नभई कम्मर मरकाएर पनि चर्चामा रहने छन् ।

उपाधि विजेता भारतीय खेलाडीले लगाएको ‘ह्वाइट ज्याकेट’ के हो ?