कोशी प्रदेश पर्यटन वर्ष २०८२ को तयारी अन्तिम चरणमा

झापा, २१ चैत । कोशी प्रदेश पर्यटन वर्ष–२०८२ भव्य रुपमा सफल बनाउन पर्यटन, वन तथा वातावरण मन्त्रालयले सञ्चारकर्मीसँग छलफल गरेको छ ।

पर्यटन वर्षको तयारी अन्तिम चरणमा पुगेसँगै त्यस विषयमा जानकारी गराउन मन्त्रालयले छलफल आयोजना गरेको हो । छलफल कार्यक्रममा कोशी प्रदेशका पर्यटन, वन तथा वातावरण मन्त्री सदानन्द मण्डलले, आर्थिक रुपमा कोशी प्रदेशलाई समृद्धि बनाउन प्रदेश सरकारले पर्यटन वर्ष आयोजना गर्न लागेको बताउनुभयो । कोशी प्रदेशमा रहेका कृषि, पर्यटन तथा जलविद्युतलाई वाह्रय मुलुकमा निर्यात गरेर राष्ट्रपुजी निमार्ण गर्न सकिने उहाँको भनाई थियो ।

उहाँले बढिभन्दा बढी भारतीय पर्यटकलाई प्रदेशमा भित्र्याउने गरि यहाँका ऐतिहासिक धार्मिक स्थललाई व्यवस्थित बनाउने काम भइरहेको बताउनुभयो । पर्यटन वर्षका लागि प्रदेश सरकारले १० करोड बजेट विनियोजन गरेको उहाँले बताउनुभयो । कार्यक्रममा मन्त्रालयका सचिव विशाल घिमिरेले, पर्यटन वर्ष तयारीका विषयमा जानकारी गराउँदै वाह्रय मुलुकबाट पर्यटक भित्र्याएर शत प्रतिशत उपलब्धि हासिल गर्नेगरि मन्त्रालयले काम गरिरहेको बताउनुभयो ।

उहाँले पर्यटन वर्षलाई लक्षित गर्दै मन्त्रालयले भारतीय पर्यटन व्यवसायीसँग उनीहरूको सहज आगमन र सुरक्षाका विषयमा छलफल गर्दै पर्यटन वर्षको तयारी गर्दै आएको यस विषयमा प्रचार प्रसार आवश्यक बताउनुभयो ।

पर्यटन वर्ष–२०८२ का सह–संयोजक भवेष श्रेष्ठ तथा पर्यटन प्रवर्धनका लागि जिल्ला तथा स्थानीय तहमा पर्यटन डेस्क स्थापना गर्नुपर्नेमा जोड दिनुभयो ।
पर्यटन वर्ष–२०८२ का अर्का सह–संयोजक कृष्ण साहले २०८१ साललाई आधार वर्ष मानेर पर्यटन वर्षको तयारी गरिएको बताउनुभयो । सो अवसरमा सञ्चारकर्मीहरूले सीमा नाकामा पर्यटकहरूका सहज आगमन, उनीहरूको सुरक्षा तथा पर्यटकहरूको बसाई लम्ब्याउने गरि पर्यटकीय गन्तव्यहरूलाई व्यवस्थित बनाउँदै सडक पूर्वाधार निमार्णमा जोड दिनुपर्ने सुझाव दिएका थिए ।

सो अवसरमा मन्त्री मण्डलले पर्यटन वर्ष–२०८२ को लोगो अनावरण गर्नुभएको थियो भने मन्त्रालयका सचिव घिमिरेले लोगोको विषयमा सञ्चारकर्मीहरूलाई जानकारी गराउनुभएको थियो । पर्यटन वर्षको शुभारम्भ तेह्रथुम जिल्लाका लालीगुराँसको राजधानी तिनजुरेबाट यही चैत २७ गते प्रधानमन्त्री केपी शर्मा ओलीले पर्यटन वर्षको शुभारम्भ गर्नुहुने कार्यक्रम रहेको छ ।

प्रदेश सरकारले पर्यटन वर्षमा कोशी प्रदेशमा ३ लाखभन्दा बढी पर्यटक भित्र्याउने लक्ष्य लिएको छ ।

The post कोशी प्रदेश पर्यटन वर्ष २०८२ को तयारी अन्तिम चरणमा appeared first on Jhapa Online.