एनआरएनए दक्षिण अस्ट्रेलिया राज्य संयोजकमा थीर गुरूङको उम्मेदवारी घोषणा

एडिलेड । गैरआवासीय नेपाली संघ (एनआरएनए) को दक्षिण अस्ट्रेलिया राज्य संयोजकमा थीर गुरूङले उम्मेदवारी घोषणा गरेका छन् ।

गुरूङ हाल एनआरएनए अस्ट्रेलियाको सचिव रहेका छन् । एनआरएनए अस्ट्रेलियाको आउँदो जुलाई २६ मा निर्वाचन हुँदै छ । १८ वर्षदेखि अस्ट्रेलिया बसोबास गरिरहेका गुरुङले एनआरएनएसहित विभिन्न नेपाली संघसंस्थामा सक्रिय स्वयंसेवकको रूपमा काम गर्दै आएका छन् ।  पारदर्शिता, जवाफदेहिता, र समावेशीताको मूलमन्त्रका साथ काम गर्न आफुले उम्मेदवारी दिएको गुरूङले बताए ।

उनले नयाँ पुस्तालाई एनआरएनए मा सहभागी गराउने अवसरहरू सिर्जना गर्ने, दक्षिण अस्ट्रेलियामा रहेका नेपालीहरूको हकअधिकार, सहयोग र एकताका लागि निस्वार्थ काम गर्ने, आपतकालीन सहायता, विद्यार्थीलाई सहयोग र सामाजिक कार्यक्रमहरूलाई अझ प्रभावकारी बनाउने बताएका छन् ।

उम्मेदवारी घोषणा गर्दै उनले नेपाली सामुदायिक हल बनाउने प्रक्रियाका लागि बृहत छलफल र आर्थिक संकलन गर्ने बताएका छन् । यस्तै दोस्रो पुस्ताका नानी बाबुहरूको कला तथा प्रतिभा देखाउने कार्यक्रम गर्ने, प्रत्येक ३ देखि ६ महिनामा नेपाली समुदायबीच भैपरी आएका समस्या र समाधानका लागि छलफल र पारदर्शी समाधान का लागि प्रयास गर्ने बताएका छन् ।

‘एनआरएनए कुनै व्यक्ति विशेषको संस्था होइन ,यो हामी सबैको साझा घर हो। अबको नेतृत्व सहकार्य र विश्वास सहितको होस् । म तपाईंहरूको अमूल्य मत र साथको अपेक्षामा छु’, गुरूङले भने, ‘सँगै मिलेर सामाजिक काम गरौं — अबको यात्रा तपाईंहरूको साथ, मेरो आवाज ।’

ए