ऋषभ बने एकै टेस्टमा दुई शतक प्रहार गर्ने दोस्रो विकेटकिपर

काठमाडौं । भारतीय विकेटकिपर–ब्याट्सम्यान ऋषभ पन्तले इंग्ल्यान्डविरुद्धको पहिलो टेस्टमा ऐतिहासिक प्रदर्शन गर्दै टेस्ट क्रिकेटमा एक दुर्लभ कीर्तिमान आफ्नो नाममा लेखाएका छन् ।

पन्तले बेलायतको लिड्समा जारी टेस्टको पहिलो इनिङ्समा १३४ रनको शतकीय पारी खेलेपछि दोस्रो इनिङ्समा पनि १३० बलमा ११८ रनको अर्को शतक प्रहार गर्दै एकै टेस्टमा दुई शतक बनाउने दोस्रो विकेटकिपर बनेका छन् ।

यसअघि एन्डी फ्लावर मात्र एकजना विकेटकिपर थिए जसले एकै टेस्टमा दुई शतक बनाएका थिए । उनले सन् १९९९ मा जिम्बावेको हरारेमा दक्षिण अफ्रिकाविरुद्ध १४२ र अविजित १९९ रन बनाएका थिए ।

टेस्टमा सबैभन्दा धेरै शतक बनाउने भारतीय विकेटकिपरको रूपमा पन्तको यो आठौँ शतक हो । यससँगै उनले महेन्द्रसिंह धोनीको कीर्तिमान पार गरेका छन् ।

पन्त ३ हजार टेस्ट रन पूरा गर्ने धोनीपछि दोस्रो भारतीय विकेटकिपर भएका छन् । इंग्ल्यान्डमा यो उनको चौथो टेस्ट शतक हो ।

उनी इंग्ल्यान्डमा दुई शतक बनाउने पहिलो भारतीय खेलाडीसमेत हुन् ।

यस टेस्टको पहिलो इनिङ्समा भारतले ४७१ रन बनाएको थियो, जसमा पन्तले शुभमन गिलसँग चौथो विकेटका लागि २०९ रनको साझेदारी गरे । गिलले पनि शतक प्रहार गरेका थिए । इंग्ल्यान्डले आफ्नो पहिलो इनिङ्समा ४६५ रन बनायो जसलाई जसप्रीत बुमराहको पाँच विकेटले सीमित राख्यो ।

दोस्रो इनिङ्समा भारतको अग्रता ३०० रन नजिक पुगेको छ, जसमा पन्त र केएल राहुलबीचको उत्कृष्ट साझेदारीको भूमिका छ ।