ट्रम्प विरुद्धको  निरन्तर ‘नो किंग्स’ आन्दोलनले अमेरिकामा तनाव

काठमाडौं । 

अमेरिका चरित्र पनि आफैमा अद्वितीय रहेको छ। खासमा संसारलाई लोकतन्त्र सिकाउने स्वयम् अमेरिका भने आजकाल तानाशाहीको आरोपसँगै आन्तरिक संघर्ष गरिरहेका छन् । 

गत आइतबार एकातिर ट्रम्प, उनको पार्टी, उनका समर्थक र सेनाले उत्सव मनाइरहेका थिए भने अर्कोतर्फ देशका हजारौं जनता ट्रम्प विरुद्ध सडकमा उत्रिएर प्रदर्शन गरिरहेका थिए । यससँगै लोकतान्त्रिक पार्टीले देशका सर्वोच्च नेतामाथि तानाशाहीको आरोप मात्रै लगाएन, नाराबाजी र देशैभरी प्रदर्शनसमेत गरेका छन्।

लामो समय पछि फेरि पनि लोकतन्त्र र नागरिक अधिकारको पक्षमा सडकमा अमेरिकनहरूको भीड जम्मा भएको छ । राष्ट्रपति डोनाल्ड ट्रम्पको नीतिहरूमा विशेष गरी आप्रवासीहरू माथिको ज्यादतीको विरुद्धमा शनिबार र आइतबार देशभर व्यापक विरोध प्रदर्शन भएको छ । यी प्रदर्शनहरूलाई ‘नो किंग्स’ आन्दोलनको नाम दिइएको थियो, जुन ट्रम्पको ‘तानाशाही शैली’ विरुद्ध आवाजको रूपमा उभिएको थियो। 

 प्रदर्शनकारीहरूले ट्रम्पले अमेरिकालाई लोकतन्त्रबाट हटाएर एक व्यक्तिको शासन अर्थात् तानाशाहीतर्फ लैजाँदै गरेको गम्भिर आरोपसमेत लगाएका छन् । अमेरिकाको साना सहर देखि ठूला सहरसम्म हजारौं मानिस सडक, पार्क र चोकमा उत्रिएर ट्रम्पको बिरोध गरेका थिए । उनीहरुले हातमा ब्यानर बोकेर ‘तानाशाही चल्दैन, आप्रवासी अधिकार जिन्दाबाद’ जस्ता नारा लगाएका थिए ।

 यस राष्ट्रव्यापी विरोधको प्रतिध्वनि एटलान्टा, फिलाडेल्फिया, शिकागो, अस्टिन, न्युयोर्क र लस एन्जलस जस्ता शहरहरूमा स्पष्ट रूपमा सुनिएको थियो। स्थिति सियाटलमा अझ विशेष थियो, जहाँ स्थानीय प्रशासनका अनुसार ७० हजार भन्दा बढी मानिसहरू एकै पटक सडकमा उत्रेर विरोध प्रदर्शनमा सामेल भएका थिए । आयोजकका अनुसार अमेरिकाका सयौं स्थानमा लाखौं मानिस यस आन्दोलनको हिस्सा बने र ट्रम्प सरकारलाई लोकतान्त्रिक चेतावनी दिएका छन् ।

 तर, यी प्रदर्शनका क्रममा केही ठाउँमा हिंसात्मक घटना पनि भएका छन् । लस एन्जलस र पोर्टल्यान्डमा प्रहरीले प्रदर्शनकारीहरूलाई तितरबितर पार्न अश्रु ग्याँसको प्रयोग गरेको थियो। साल्ट लेक सिटीमा प्रदर्शनका क्रममा गोली चल्दा एकजना गम्भीर घाइते भएका छन् ।

 साल्ट लेक सिटीका प्रहरी प्रमुख ब्रायन रेडले गोली प्रहार गर्नेलाई नियन्त्रणमा लिइएको तर घटनाको पछाडि कुनै राजनैतिक नियत थियो वा नभएको कुनै कुरा पनि बताएनन् । आक्रमणकारी जुलुसमा सहभागी भीडसँगै हिँडिरहेका थिए, जसले यसलाई अझ संवेदनशील विषय बनाएको थियो।