लखनऊमाथि जितका बाबजुद चेन्नई अझै अङ्क तालिकाको पुछारमा

काठमाडौं । इन्डियन प्रिमियर लिग (आईपीएल) क्रिकेटमा चेन्नई सुपर किङ्सले लखनऊ सुपर जाइन्ट्सलाई हराएको छ ।

लखनऊमा सोमबार राति सकिएको खेलमा चेन्नईले घरेलु टोलीलाई ५ विकेटले हराएको हो ।

लखनऊले दिएको १६७ रनको लक्ष्य चेन्नईले ३ बल बाँकी छँदा ५ विकेटको क्षतिमा १६८ रन बनाएर पूरा गर्यो ।

चेन्नईको जितमा शिवम दुबेले अविजित सर्वाधिक ४३ रन बनाए ।

यही खेलबाट भारतीय क्रिकेटका लिजेन्डसमेत रहेका कार्यवाहक कप्तान महेन्द्रसिंह धोनीले आईपीएलको इतिहासमा अर्को कीर्तिमान कायम गरे । उनी आईपीएल इतिहासमा २०० डिसमिसल पूरा गर्ने पहिलो विकेटकिपर बनेका छन् ।

लखनऊ आयुष बदोनीलाई स्टम्पिङ आउट गर्दै धोनीले २००औं डिसमिसल पूरा गरेका हुन् । उनको नाममा १५४ क्याच र ४६ स्टम्पिङ छन्, जुन विकेटकिपरको रुपमा एउटा अद्वितीय रेकर्ड हो । ११ बलमा अविजित २६ रन बनाएका धोनी खेलको उत्कृष्ट खेलाडी घोषित भए ।

यस्तै २२ बलमा ३७ रन बनाएका रचिन रवीन्द्र सबैभन्दा मूल्यवान खेलाडी बने । शाइक रसीदले २७ रन जोडे ।
लखनऊका रवि विष्नोईले २ विकेट लिए ।

यसअघि टस हारेर पहिले ब्याटिङको निम्तो पाएको लखनऊले पूरै २० ओभर खेल्दै ७ विकेटको क्षतिमा १६६ रन बनाएको थियो ।

कप्तान ऋषभ पन्तले अर्धशतकीय पारी खेल्दै सर्वाधिक ६३ रन बनाए ।

चेन्नईका रवीन्द्र जडेजा र मथीशा पथीरानाले सर्वाधिक २–२ विकेट लिए ।

यस सिजन चेन्नईले ७ खेल खेल्दा दोस्रो जित हासिल गरेको हो । यस जितबाट थप २ अङ्क जोडेको चेन्नई १० टोली सहभागी प्रतियोगितामा अझै तालिकाको पुछारमा छ । उसले मात्र ४ अङ्क जोडेको छ ।

लखनऊ भने हारका बाबजुद ८ अङ्कसहित तालिकाको चौथो स्थानमा छ । यो प्लेअफ स्थान हो ।

अङ्क तालिका :

दिल्लीको विजय यात्रामा ‘ब्रेक’