हल्दिबारी–४ बालमैत्री वडा घोषणाको अन्तिम चरणमा

हल्दिबारी, २५ साउन । झापाको हल्दीबारी गाउँपालिका–४ बालमैत्री वडा घोषणाको अन्तिम चरणमा पुगेको छ । बालमैत्री स्थानीय शासन वडा समितिका संयोजक तथा वडा अध्यक्ष सन्तकुमार थापाको अध्यक्षता र गाउँपालिका अध्यक्ष रविन्द्र प्रसाद लिङ्देनको प्रमुख आतिथ्यतामा आयोजित कार्यक्रममा, बालमैत्री स्थानीय शासन घोषणा उन्मुख अभियान सञ्चालनपश्चात सूचकहरूको नतिजा निर्धारण र प्रमाणीकरण सम्पन्न गरिएको हो ।

गाउँपालिकाका विभिन्न शाखा प्रमुखहरूले सूचकको नतिजा निर्धारण तथा प्रमाणीकरणमा हस्ताक्षर गरेपछि, वडा बालमैत्री घोषणा उन्मुख भएको घोषणा सहजकर्ता सुमन ढकालले जानकारी दिए । उनका अनुसार, ५१ वटा मुख्य सूचकमध्ये दुई वर्षमा ८० प्रतिशत प्रगति हासिल भएकाले गाउँपालिकाको अनुगमनपछि जिल्ला समन्वय समिति झापाले बालमैत्री वडा घोषणा गर्ने छ ।

दुई वर्षको अवधिमा पाँच चरणमा २८ वटा सूचक पूरा गर्दै वडा नम्बर ४, हल्दीबारी गाउँपालिकाको पहिलो बालमैत्री वडा बन्ने तयारीमा पुगेको हो । कार्यक्रममा पालिका उपाध्यक्ष लक्ष्मीदेवी मैनाली, बालबालिका शाखा प्रमुख कृष्ण थापा मगर, बालमैत्री अभियान सहजकर्ता सुमन ढकाललगायतले मन्तव्य राखेका थिए ।

पालिका प्रमुख प्रशासकीय अधिकृत मानबहादुर वन, महेन्द्र वडाभित्रका बाल सञ्जालका प्रतिनिधि, विद्यालयका बालसञ्जालका प्रतिनिधि, सरोकारवालाहरू, जनप्रतिनिधि र सञ्चारकर्मीहरूको उपस्थिति रहेको कार्यक्रमको स्वागत मन्तव्य कार्यपालिका सदस्य भावना दाहालले राखेकी थिइन् । कार्यक्रमको सहजीकरण निवर्तमान वडा सचिव जयप्रसाद पोखरेलले गरेका थिए ।

The post हल्दिबारी–४ बालमैत्री वडा घोषणाको अन्तिम चरणमा appeared first on Jhapa Online.