सरकारी स्कुल छिरेर धर्म प्रचार गर्ने पास्टर जन्मजय भट्टराई पक्राउ

काठमाडौं । कैलालीमा सरकारी विद्यालयमा छिरेर विद्यार्थीहरूलाई धर्म परिवर्तन गराएको आरोपमा चर्चका एकजना पास्टर पक्राउ परेका छन् ।

पक्राउ पर्नेमा कैलालीको लम्कीचुहा नगरपालिका–१ मा रहेको लम्की सामुदायिक चर्चका पास्टर जन्मजय भट्टराई रहेको प्रहरीले जनाएको छ ।

धर्म परिवर्तन गराएको अभियोगमा पक्राउ गरेर अनुसन्धान गरिरहेको कैलालीका प्रहरी उपरीक्षक (एसपी) पदमबहादुर विष्टले बताए ।

उनका अनुसार धर्म परिवर्तन शीर्षकमै किटानी जाहेरी लिएर इलाका प्रहरी कार्यालय लम्कीले अदालतबाट म्याद थपेर भट्टराईमाथि अनुसन्धान गरिरहेको छ ।

भट्टराईले ‘क्रिसमस डे’को पूर्वसन्ध्यामा लम्की क्षेत्रका विद्यालयमा पुगेर शैक्षिक सामग्री वितरण गर्ने बहानामा विद्यार्थीहरूलाई इसाई धर्ममा लाग्न प्रेरित गरेको आरोप छ ।

उनले लम्की चुहानगरपालिका–१ मा रहेको शहीद स्मृति माध्यमिक विद्यालयका विद्यार्थीहरूलाई बाइबल र इसुको बारेमा प्रचार गर्दै इसाई धर्म अङ्गाल्न अनुरोध गरेको भिडिओ समेत सामाजिक सञ्जालमा भाइरल छ ।

उनले भाइरल भिडिओमा माओवादीका नेता पनि इसाईमा लागेको दाबी गरेका छन् । यस विषयमा माओवादीको आधिकारिक धारणा भने सार्वजनिक भएको छैन ।