खो खो विश्वकप : महिलातर्फको उपाधि भारतलाई, नेपाल उपविजेता

काठमाडौं । खो खो विश्वकपमा  महिलातर्फको उपाधि भारतले हात पारेको छ । नयाँ दिल्लीस्थित इन्दिरा गान्धी इन्डोर हलमा आइतबार भएको फाइनल खेलमा नेपाल भारतसँग ७८-४० ले पराजित भएको हो ।

घरेलु टोली भारत अपराजित रहँदै च्याम्पियन बनेपछि नेपाल उपविजेता बनेको हो । सो प्रतियोगितामा नेपाल पनि अपराजित रहँदै फाइनलमा पुगेको थियो ।

नेपालले समूहमा पहिलो खेलमा भुटानलाई ९३-२४ ले, दोस्रो खेलमा जर्मनीलाई ७३-३४ ले, तेस्रो खेलमा श्रीलंकालाई ११०-१० ले र चौथो खेलमा बंगलादेशलाई ८४-२४ ले पराजित गरेको थियो ।

सरस्वती कडायतको कप्तानीमा खेलेको नेपाली टोलीले क्‍वाटरफाइनलमा इरानलाई १०३-८ अंकले पराजित गरेको थियो ।    यस्तै  सेमिफाइनल खेलमा नेपालले युगाण्डालाई ८९-१८ ले पराजित गरेको थियो ।