भोजपुरमा पक्राउ परेपछि बाटोबाटै भागेका नाइजेरियन नागरिक फेरि समातिए

काठमाडौं । अवैध रूपमा नेपाल बसिरहेका एक नाइजेरियन नागरिक भोजपुरबाट पक्राउ परे । तर, काठमाडौं ल्याउँदै गर्दा बाटोबाटै भागेका ति नागरिक फेरि पक्राउ परेका छन् ।

भोजपुरबाट काठमाडौं ल्याउँदै गर्दा सिन्धुलीको गोलन्जोर गाउँपालिका–७, अधेरी पुलनजिकै उनी मङ्गलबार बिहान भागेको प्रहरीले जनाएको छ ।

२५ वर्षीय नाइजेरियन नागरिक ओलुवासोगो ग्लोरीलाई भोजपुर प्रहरीले ७ माघमा भोजपुरको पौवादुम्मा गाउँपालिका–३ बाट पक्राउ गरेको थियो ।

प्रहरीलाई छलेर भागेपछि उनी जङ्गलमा लुकेर बसेका थिए । पछि गाडीमा चढेर काठमाडौं आउने क्रममा प्रहरी चौकी गढीको टोलीले उनलाई पक्राउ गरेको हो ।

उनलाई अध्यागमनमा बुझाउने तयारी भइरहेको प्रहरीले जनाएको छ ।