शिवसताक्षीमा फार्मालिनयुक्त भारतीय माछा जफत

झापा, १३ माघ । झापाको शिवसताक्षी नगरपालिकाले नगर क्षेत्रमा मानव स्वास्थ्यमा असर गर्ने फार्मलिनयुक्त माछा बरामद गरी नष्ट गरेको छ ।

नगरपालिकाले नगर क्षेत्रमा फार्मलिनयुक्त माछा बिक्री–वितरणमा रोक लगाएसँगै आज बजार अनगुमन गरेर त्यस्ता माछा जफत गरी नष्ट गरेको हो । शिवसताक्षी नगरपालिकाको अनुगमन टोली शिवसताक्षी–६ स्थित शिवगञ्ज बजारबाट ४४ केजी माछा जफत गरी खाल्डो खनेर गाडेको छ ।

नगरपालिकाकी उपप्रमुख तथा अनुगमन टोलीकी संयोजक नरमाया कार्की, प्रमुख प्रशासकीय अधिकृत सुनिता तुम्बाङफे, राजश्व शाखा प्रमुख विमल बास्कोटा, नेपाल तथा नगर प्रहरी लगायतको टोलीले बजार अनुगमन गरी तीन वटा पसलबाट माछा जफत गरेको छ ।

बरामद माछा नगरपालिकाको कार्यालय परिसरमा खाल्डो खनेर गाडिएको उपप्रमुख नरमाया कार्कीले जानकारी दिनुभयो । “नगरबासीले भारतबाट आयातित फार्मलिनयुक्त माछाले मानव स्वास्थ्यमा असर परेको गुनासो गरेपछि त्यस्ता माछा बिक्री–तिवरणमा कडाइँ गरिएको छ”, उहाँले भन्नुभयो, “स्वास्थ्यका लागि हानिकारक फर्मालिन प्रयोग गरिएको माछाको सेवनले क्यान्सर जस्तो घातक रोग लाग्न सक्ने हुँदा बिक्रीमा प्रतिबन्ध लगाएका हौं ।”

माछामा फर्मालिन प्रयोग नगर्नु र मरेका माछा बिक्री वितरण नगर्नु भनेर व्यवसायीलाई सूचित गरिएको प्रमुख प्रशासकीय अधिकृत सुनिता तुम्वाङफेले बताउनुभयो । “उहाँहरुले बेच्न नछोडेपछि आज जफत गरेर नष्ट गरेका छौं”, उहाँले भन्नुभयो ।

अनुगमनका क्रममा शिवगञ्ज बजारबाट भुटन चौधरीको पसलबाट २० केजी, उपेन्द्र सहनीको पसलबाट दुई केजी र दिपक शाहीको पसलबाट २२ केजी फार्मालिनयुक्त माछा जफत गरिएको थियो । नगरपालिकाले गत माघ १० गते सूचना जारी गर्दै फर्मालिनयुक्त माछा बिक्रीमा प्रतिबन्ध लगाएको थियो ।

The post शिवसताक्षीमा फार्मालिनयुक्त भारतीय माछा जफत appeared first on Jhapa Online.