महिला टी-२० श्रृङ्खला आजदेखि : पहिलोपल्ट एक-अर्काको सामना गर्दै नेपाल र नेदरल्यान्ड्स

काठमाडौं । काठमाडौंमा आज(बिहीबार)देखि नेपाल, नेदरल्यानड्स र थाइल्यान्ड सम्मिलित महिला टी–२० आई क्रिकेट श्रृङ्खला सुरू हुँदैछ । पहिलो खेलमा घरेलु टोली नेपालले नेदरल्यान्ड्सको सामना गर्दैछ ।

यो खेल कीर्तिपुरस्थित त्रिवि मैदानमा मध्यान्ह १२ बजेदेखि सुरु हुँदैछ ।

नेपाल र नेदरल्यान्ड्स पहिलोपटक एक–अर्काविरुद्ध उत्रन लागेका छन् । यसर्थ आज यो खेल रोमाञ्चक हुने अपेक्षा गरिएको छ ।

त्रिकोणात्मक टी–२० शृङ्खलाको ट्रफी बुधबार सार्वजनिक गरिएको थियो ।

नेपाल क्रिकेट सङ्घ (क्यान)ले टी–२० शृङ्खलाको पूर्वसन्ध्यामा बुधबार काठमाडौंमा आयोजना गरेको पत्रकार सम्मेलनमा ट्रफी सार्वजनिक गरिएको हो । नेपाली राष्ट्रिय महिला क्रिकेट टोलीकी कप्तान इन्दु बर्मा, नेदरल्यान्ड्सकी कप्तान बाबेट डे लिडे र थाइल्यान्डकी कप्तान नारुमोल चाइवाईले संयुक्त रूपमा ट्रफी सार्वजनिक गरेका हुन् ।

पत्रकार सम्मेलनमा कप्तान बर्माले यो शृङ्खला आफूहरूका लागि महत्वपूर्ण रहेको बताउँदै ट्रफी जित्ने विश्वास व्यक्त गरिन् । उनले नेपालको टोली सन्तुलित रहेको बताउँदै आफूहरूले राम्रो प्रदर्शन गर्ने बताइन् ।

यस्तै, नेदरल्यान्ड्सकी कप्तान लिडे र थाइल्यान्डकी कप्तान चाइवाईले पनि शृङ्खलाको उपाधि आफ्नो टिमले हात पार्ने दाबी गरे । शृङ्खलाका लागि क्यानले यसअघि बर्माको कप्तानीमा १५ सदस्यीय नेपाली टोलीको घोषणा गरेको थियो ।

नेपाली टोलीमा कप्तान बर्मासहित रुविना क्षेत्री, सीता रानामगर, पूजा महतो, विन्दु रावल, रेवती धामी, कविता कुँवर, सम्झना खड्का, ममता चौधरी, राजमती ऐरी, कविता जोशी, एलिसाकुमारी यादव, रोमा थापा, मनिषा उपाध्याय र ईश्वरी विष्ट रहेका छन् ।

आजदेखि सुरु भई माघ २५ गतेसम्म सञ्चालन हुने शृङ्खलाका सबै खेल कीर्तिपुरस्थित त्रिवि क्रिकेट मैदानमा हुनेछन् ।

त्रिकोणात्मक टी–२० शृङ्खलाको ट्रफी सार्वजनिक