नेदरल्याण्ड्सकी राइकेको उत्कृष्ट ब्याटिङ, नेपाललाई १५८ रनको लक्ष्य

काठमाडौं । महिला त्रिकोणात्मक टी–२० क्रिकेट सिरिजमा नेदरल्याण्ड्सले नेपाललाई १५८  रनको लक्ष्य दिएको छ ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा जारी खेलमा नेदरल्याण्ड्सले निर्धारित २० ओभरमा ४ विकेटको क्षतिमा १५७ रन बनाएको हो ।

नेदरल्याण्ड्सका रोबिन राइकेले अर्धशतकीय पारी खेलिन् । उनले ४८ बलमा ८ चौका प्रहार गर्दै ५९ रन जोडिन् ।

ओपनर फेबे मोल्केनबोयर शून्यमा आउट हुँदा स्टेरे कालिस र कप्तान बाबेट डे लीडेले क्रिज सम्हालेका थिए । कालिसले २९ रन बनाउँदा लीडेले ६ रनमै आउट भइन् ।

हेदर सिगर्सले २३ रन जोड्दा आइरिस जुइलिङ ३१ रनमा अविजित रहिन् ।

नेपालका लागि ईश्वरी विष्ट, सीता राना मगर, कविता कुँवर र पूजा महतोले एक/एक विकेट लिइन् ।

नेदरल्याण्ड्सविरुद्धको खेलमा अलिशा के यादव र मनिषा उपाध्यायले राष्ट्रिय टोलीमा डेब्यू गरेका छन् । अलिशा नेपालका लागि डेब्यू गर्ने ३४ औं खेलाडी बनिन् भने मनिषा ३५औं खेलाडी ।