खो खो विश्वकपमा पुरुषतर्फ पनि नेपाल उपविजेता

काठमाडौं । खो खो विश्वकपको पुरुषतर्फ पनि नेपाल उपविजेता बनेको छ । नयाँ दिल्लीस्थित इन्दिरा गान्धी इन्डोर हलमा आइतबार राती सम्पन्न खेलमा पुरुषतर्फ नेपाल घरेलु टोली भारतसँग ५४–३६ अन्तरले पराजित भएको हो ।

भारतले महिला र पुरुष दुवै विधामा उपाधि जित्दा नेपाल भने दुवैमा उपविजेता बन्यो । यसअघि भएको महिलातर्फको फाइनलमा पनि नेपाल भारतसँग नै पराजित हुँदै उपविजेतामा सिमित  रहेको थियो ।

पुरुषतर्फ नेपाल समूह ए को उपविजेता बन्दै क्‍वाटरफाइनलमा प्रवेश गरेको थियो । पहिलो खेलमा भारतसँग ४२-३७ अन्तरले पराजित भएको नेपालले दोस्रो खेलमा पेरूलाई ८०-३४ ले, तेस्रो खेलमा ब्राजिललाई १३४-८ अन्तरले र चौथो खेलमा भुटानलाई ९८-८ अन्तरले हराउँदै अन्तिम आठमा प्रवेश गरेको थियो ।

क्‍वाटरफाइनलमा बंगलादेशलाई ६७-१८ को अन्तरले हराएको नेपालले सेमिफाइनलमा इरानलाई ७२-२० ले पराजित गर्दै फाइनल प्रवेश गरेको थियो ।