एनकेएल उपाधि : जनकपुरले जित्ला कि काठमाडौंले ?

काठमाडौं । फ्रेन्चाइज टिमको अवधारणमा पहिलोपल्ट आयोजित नेपाल कबड्डी लिग (एनकेएल)को फाइनलमा शुक्रबार जनकपुर नाइट्स र काठमाडौं माभरिक्स दशरथ रङ्गशालास्थित कभर्डहलमा भिड्दै छन् ।

जनकपुर पूरा प्रतियोगितामै उत्कृष्ट लयमा रहेको छ । जनकपुरले चार जित र एक बराबरीसँगै लिग चरणमा शीर्षस्थान हासिल गरेको थियो ।

त्यसपछि क्वालिफायर-१ मा विराटनगर ब्यान्डिट्सलाई पराजित गर्दै फाइनलमा स्थान बनाएको जनकपुर आकर्षक ट्रफी कब्जा गर्दै जनकपुरधाम लैजाने योजनामा छ ।

तर, काठमाडौंले त्यति सजिलै जनकपुरलाई फाइनल भने जित्न दिने छैन । यो टिम तीन जित, एक बराबरी र एक हारको नतिजासँगै लिगमा तेस्रो भएको थियो ।

त्यसपछि इलिमिनेटरमा धनगढी वाइल्डक्याट्स र क्वालिफायर-२ मा विराटनगरलाई पन्छाउँदै फाइनलमा पुगेको हो । यसबीच काठमाडौंको प्रदर्शन सुधारिदैँ गएको छ ।

भारतको प्रो कबड्डी लिग पीकेएल च्याम्पियन कप्तान घनश्याम रोका मगरको उत्कृष्ट प्रदर्शनसँगै भाग्यको साथले फाइनल पुगेको काठमाडौं आकर्षक ट्रफीलाई राजधानीमै सजाउन चाहन्छ । घनश्यामलाई रोक्नसके जनकपुर च्याम्पियन बन्ने प्रबल सम्भावना छ । अर्कोतिर, थाइल्यान्डका चाहपोन कामुनीको आक्रामणलाई निस्तेज पार्नसके काठमाडौं च्याम्पियन बन्नसक्छ ।

यी दुई टिमबीच लिगमा पनि प्रतिस्पर्धा भएको थियो, जहाँ नतिजाले दुवै टिमलाई जित्न दिएन, हार्‍यो भन्न पनि मिलेन । मतलब स्कोर ३९–३९ को बराबरीमै खेल सकियो । यो एनकेएलमा जनकपुर जितबाट बन्चित भएको एकमात्र खेल पनि हो यो । त्यसैले काठमाडौंलाई हराउने अभियानलाई फाइनलमा पूर्णता दिएर जनकपुर एनकेएलको उपाधि जित्न आतुर छ ।

जनकपुरको लक्ष्य पनि प्रष्टै छ, जनकपुर बोल्ट्सले गत महिना नेपाल प्रिमियर लिग एनपीएल क्रिकेटको उपाधि जितेर मनाएको उत्सवलाई कबड्डीमा रुपान्तरण गर्ने ।

बिहीबार आयोजित पत्रकार सम्मेलनमा काठमाडौंका कप्तान घनश्याम रोका मगरले भनेका थिए, ‘जनकपुर निकै राम्रो टिम हो । हामी राम्रो खेल्दै एनकेएल च्याम्पियन बन्न चाहन्छौं ।’ हरियाणा स्टिलर्सबाट पीकेएल च्याम्पियन भएका उनी राष्ट्रिय टिमकासमेत कप्तान हुन् ।

काठमाडौंका प्रशिक्षक सरोजकुमार सिंहले पनि मेहनत गर्दै आफ्नो टिम उपाधि जित्न तयार रहेको बताए ।

जनकपुरका प्रशिक्षक पार्वती राई भन्छिन्, ‘हाम्रो टिमले अहिलेसम्म राम्रो खेलिरहेका छौं । अब बाँकी एक खेल पनि राम्रो खेल्दै च्याम्पियन ट्रफी उचाल्न चाहन्छौं ।’

उनी एनकेएलका ६ टिमका प्रशिक्षकमध्ये एक्ली महिला हुन् । राष्ट्रिय खेलकुद परिषदअन्तर्गत कबड्डीका मुख्य प्रशिक्षक रहेकी पार्वती राईकै नेतृत्वमा नेपाली महिला टिमले १९औं एसियाली खेलकुद २०२२ मा ऐतिहासिक कास्यपदक जितेको थियो ।

जनकपुरका कप्तान रामु टमटाले पनि आफ्नो टिम राम्रो लयमा भएकोले फाइनलमा उत्कृष्ट प्रदर्शन गर्दै उपाधि जित्ने कोसिस गर्ने बताए ।

फाइनल दशरथ रङ्गशालास्थित कभर्डहलमा शुक्रबार साँझ ६ः ३० बजेदेखि सुरु हुनेछ ।