नेविसंघ केन्द्रीय सदस्यद्वारा पथरीका विद्यार्थीमाथि हातपात

पथरी। 

 स्ववियु निर्वाचनको माहोल देशभर तातेका बेला मोरङको पथरी बहुमुखी क्याम्पसमा भने असहज स्थिति सिर्जना भएको छ।

चैत्र ५ गतेका लागि तय गरिएको स्ववियु निर्वाचनको तयारीस्वरूप विभिन्न कलेजहरूमा सोमबार (फागुन १९ गते) दल दर्ता भइरहेको थियो। तर, पथरी बहुमुखी क्याम्पसमा दल दर्ताकै क्रममा नेविसंघ केन्द्रीय सदस्य सुविन पराजुलीले सोही क्याम्पसका विद्यार्थी सोमनाथ फुयाँलमाथि हातपात गरेका छन्।

पराजुलीले ‘म केन्द्रीय सदस्य हुँ, तिमीलाई कारबाही गर्न सक्छु’ भन्दै धम्की दिएपछि फुयाँल आक्रोशित बनेका थिए।

पराजुली नेपाली कांग्रेसका नेता कृष्णप्रसाद सिटौलानिकट हुन् भने फुयाँल कांग्रेस नेता शेखर कोइरालानिकट हुन्।

उनीहरूबीच भनाभन हुँदै स्थिति हात हालाहालसम्म पुगेको देखिएको छ। घटनाको सिसिटिभी फुटेजमा दुवै पक्षबीचको घम्साघम्सी स्पष्ट देख्न सकिन्छ।

पीडित विद्यार्थी सोमनाथ फुयाँल नेविसंघ मोरङ जिल्ला सदस्य तथा पथरी बहुमुखी क्याम्पस स्ववियुका सदस्यसमेत हुन्। यो घटनाले निर्वाचनपूर्वको माहोललाई अझ तनावपूर्ण बनाएको छ।

केही दिनअघि नेविसंघमा कांग्रेस सभापति शेरबहादुर देउवा र कांग्रेस नेता शेखर कोइराला समूहबीच महेन्द्र मोरङ क्याम्पस विराटनगरमा तनाव भएको थियो। यसक्रममा कुटाकुट हुँदा कोइराला समूहका नेता घाइते भएका थिए।