गणतन्त्रका लागि देशका हरेक ढुङ्गामा जनताको रगत पोखिएको छ : प्रचण्ड

काठमाडौं । नेपाल कम्युनिस्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ले गणतन्त्रका लागि देशका हरेक ढुङ्गामा जनताको रगत पोखिएको  बताएका छन् ।

मङ्गलबार प्रतिनिधि सभामा बोल्दै गणतन्त्र स्थापनाका लागि नेपाली जनताले गरेको बलिदानलाई स्मरण गर्दै यसलाई कुनै ‘शाही बक्सिस्’ नभएको बताए ।

‘पूर्व राजाले प्रयोग गर्ने भाषामा म जान्नँ, तर यो देशमा गणतन्त्र कुनै शाही बक्सिस्‌ले आएको होइन । गणतन्त्रका लागि यो देशका लगभग हरेक ढुङ्गामा जनताको रगत पोखिएको छ,’ प्रचण्डले भने ।

उनले गणतन्त्रको स्थापनामा केवल माओवादीको मात्र योगदान नभएको स्पष्ट पार्दै भने, ‘सीमित माओवादीले मात्र बन्दुक उठाएर आएको होइन, गणतन्त्र । सबैभन्दा सीमान्त वर्ग र वर्णले आफ्नै रगतले नुहाएर लेखेको हो, यो देशमा गणतन्त्रको इतिहास ।’

प्रचण्डले आफ्नो सम्बोधनको अन्त्यमा चेतावनी दिँदै भने, ‘सार्वभौम भइसकेको नागरिकलाई रैती बनाउन अब सम्भव छैन ।’