दुई दिनदेखि अवरुद्ध प्रतिनिधिसभा बैठक बस्दै

काठमाडौं । सङ्घीय संसदका दुवै सदनको बैठक आज (शुक्रबार) बस्दैछ । प्रतिनिधिसभाको बैठक बिहान ११ तथा राष्ट्रियसभा दिउँसो १ः१५ बजे बस्ने संसद् सचिवालयले जनाएको छ ।

यसअघि बुधबार र बिहीबार लगातार दुई दिन प्रतिनिधिसभाको बैठक कुनै बिजनेस नगरी स्थगित भएको थियो ।

बिहीबार तीन पटक स्थगित भएर प्रतिनिधिसभाको बैठक आज बस्न लागेको हो ।

बिहीबार ११ बजे डाकिएको बैठकमा दलहबीच सहमति जुट्न नसक्दा दिउँसो २ बजेसम्मका लागि स्थगित गरिएको थियो । २ बजे पनि बस्ने नसकेपछि अपराह्न ४ बजेका लागि बैठक बस्ने तय भएको थियो ।

४ बजेका लागि बोलाइएको बैठक पनि स्थगित गरेर आज बिहानका लागि डाकिएको हो ।

विपक्षी दलले चार महिना मात्रै कार्यकाल बाँकी रहेका कुलमान घिसिङलाई विद्युत् प्राधिकरणको कार्यकारी निर्देशकबाट हटाइएको विषयमा प्रधानमन्त्रीको जवाफ माग गर्दै बुधबारको बैठक पनि अवरुद्ध गरेको थियो ।

सोमबार सरकारले घिसिङलाई हटाएर हितेन्द्रदेव शाक्यलाई नियुक्त गरेको थियो । घिसिङले आफूलाई हटाउने सरकारको निर्णयविरुद्ध सर्वोच्च अदालतमा रिट दायर गरेका छन् । रिटको पेसी आजलाई नै तोकिएको छ ।

संसद् सचिवालयले आजका लागि कुनै सम्भावित कार्यसूची सार्वजनिक गरेको छैन । सम्भवत आज बिहीबारकै कार्यसूचीलाई निरन्तरता दिइने छ ।

जसमा प्रधानमन्त्री केपी शर्मा ओलीले ‘लोकसेवा आयोगको ६५औँ वार्षिक प्रतिवेदन (२०८० साउन २०८१ असार)’ पेस गर्ने कार्यसूची छ ।

बैठकमा अर्थ, गृह, भौतिक पूर्वाधार तथा यातायात मन्त्रालय र संस्कृति, पर्यटन तथा नागरिक उड्डयन मन्त्रालयसँग सम्बन्धित मौखिक प्रश्नरूको उत्तर सम्बन्धित मन्त्रीहरूले दिनेछन् ।

यसैगरी ‘बैंकिङ कसुर तथा सजाय (दोस्रो संशोधन) विधेयक, २०८०’का सम्बन्धमा राष्ट्रियसभाबाट प्राप्त सन्देशसहितको विधेयक टेबुल गरिने पनि कार्यसूची छ ।

बैठकमा संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले ‘नेपाल हवाई सेवा प्राधिकरण विधेयक २०८१ माथि विचार गरियोस्’ भन्ने प्रस्ताव र ‘नेपाल नागरिक उड्डयन प्राधिकरण विधेयक, २०८१ माथि विचार गरियोस्’ भन्ने प्रस्ताव पेस गर्ने कार्यसूची छ ।

यसैगरी, उद्योग, वाणिज्य तथा आपूर्तिमन्त्री दामोदर भण्डारीले ‘निकासी पैठारी (नियमन) विधेयक, २०८१ लाई दफावार छलफलको लागि सम्बन्धित समितिमा पठाइयोस्’ भन्ने प्रस्ताव प्रस्तुत गर्ने कार्यसूची छ ।

यसैगरी राष्ट्रियसभाको बैठकमा प्रधानमन्त्री केपी शर्मा ओलीले प्रतिनिधिसभाबाट सन्देश सहित प्राप्त सुशासन प्रवर्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्नेलगायत कार्यसूची छ ।

संसद् बैठक शुक्रबारसम्मका लागि स्थगित