भारतीय र नेपाली सेनाको संयुक्त कञ्चनजङ्घा आरोहण अभियान सुरु

काठमाडौं । भारतीय रक्षामन्त्री राजननाथ सिंहले भारतीय र नेपाली सेनाको संयुक्त कञ्चनजङ्घा आरोहण अभियानको शुभारम्भ गरेका छन् ।

नयाँ दिल्लीको साउथ ब्लकबाट माउन्ट एभरेस्ट र माउन्ट कञ्चनजङ्घाका लागि आरोहण अभियानको शुभारम्भ गरिएको हो ।

नेपाली सेनाका महानिर्देशक (डीजीएमटी) मेजर जनरल ध्रुव प्रकाश शाह पनि शुभारम्भ समारोहमा सहभागी भएका थिए ।

रक्षा मन्त्री सिंहले  टोलीलाई शुभकामना दिँदै  अभियानले  राष्ट्रिय गौरव बढाउनुका साथै दुवै सेना र राष्ट्रहरूबीचको गहिरो सैन्य सम्बन्धलाई सुदृढ पार्ने महत्त्वमा जोड दिएको भारतीय दूतावासले एक्समार्फत जानकारी दिएको छ ।

भारतीय सेनाका २५ जना आरोहीहरू माउन्ट एभरेस्टको शिखरमा पुग्ने लक्ष्यमा छन् भने भारतीय सेना र नेपाली सेनाको संयुक्त टोली माउन्ट कञ्चनजङ्घा आरोहणका लागि तयार छ। साथै, १० जना एनसीसी क्याडेटहरू पनि माउन्ट एभरेस्ट आरोहण गर्ने लक्ष्यमा रहेको बताइएको छ ।

रक्षा मन्त्री सिंहले अभियान सफलताको शुभकामना समेत दिएका छन् ।

कञ्चनजङ्घा विश्वको तेस्रो अग्लो शिखर हो।