ओलीलाई बालेनको जवाफ : म तपाईँको भ्रष्ट प्रणालीलाई समर्थन गर्दिनँ

काठमाडौं । काठमाडौं महानगरपालिकाका मेयर (प्रमुख) बालेन शाहले प्रधानमन्त्री केपीलाई ‘म तपाईँको भ्रष्ट प्रणालीलाई समर्थन गर्दिनँ’ भन्दै जवाफ दिएका छन् ।
बालेनले सोमबार साँझ सामाजिक सञ्जालमार्फत ओलीले दिउँसो गरेको टिप्पणीको जवाफ दिएका हुन् ।

‘जुन देशमा राजधानीको मेयरले भ्रस्टचार रोक्छुभन्दा देशका सबै पार्टीको सबै लागेर भ्रस्टचारी जोगाउछु भन्छ ? त्यस्को नाइकेको कार्यक्रममा म गैदिनु पर्ने ?,’ उनले लेखेका छन्, सरी केपी ओली म तपाईँको भ्रष्ट प्रणालीलाई समर्थन गर्दिनँ ।’

गणतन्त्र दिवस मूल समारोह समिति गठनका लागि बोलाइएको बैठकमा काठमाडौं महानगरपालिकाका प्रमुख बान अनुपस्थित भएपछि प्रधानमन्त्री ओलीले सोमबार दिउँसो असन्तुष्टि व्यक्त गरेका थिए ।

उनले अर्को बैठकमा नबोलाउनसमेत सम्बन्धित पक्षलाई निर्देशन दिए ।

गणतन्त्र दिवस, २०८२ भव्यताका साथ मनाउनका लागि सोमबार सिंहदरबारमा प्रधानमन्त्रीको अध्यक्षतामा बैठक बसेको थियो । उक्त बैठकमा बालेनलाई पनि बोलाइएको थियो । तर, उनी गएनन् ।

त्यसप्रति असन्तुष्टि व्यक्त गर्दै ओलीले भने, ‘कहिल्यै पनि नआउने, नाम राखिरहनुपर्ने ।’