३७ हजार घर भएको जाजरकोट भूकम्पमा ४८ हजारलाई पहिलो किस्ता दिने काम भयो : प्रधानमन्त्री ओली

काठमाडौं । प्रधानमन्त्री केपी शर्मा ओलीले जाजरकोटमा भूकम्पबाट पीडितलाई भनेर बढी पैसा गएको बताएका छन् ।

सांसदको प्रश्नोत्तरमा सहभागी हुने क्रममा सांसदका प्रश्नको जवाफ दिने क्रममा ओलीले कुल ३७ हजार घर भएको ठाउँमा ४८ हजारलाई पहिलो किस्ता वितरण गरिएको बताए ।

‘जाजरकोटमा ३७ हजार घरधुरी भएको ठाउँमा ४८ हजार घरलाई पहिलो किस्ता वितरण गरेको छ । त्यो ठाउँमा ३७ हजार घर भत्किएर ४८ हजारलाई कसरी वितरण गरियो, के भएर यस्तो भयो ?,’ ओलीले प्रश्न गरे ।

जाजरकोट भूकम्पबाट प्रभावित जिल्लाहरूमा हालसम्म ३ अर्ब ९५ करोड ६५ लाख रकम निकासा भैसकेको ओलीकव भनाइ छ । रुकुम र जाजरकोट जिल्लामा जिल्ला विपद् व्यवस्थापन समितिबाट सिफारिस भै रितपूर्वक आएका सबै भूकम्प प्रभावितका लागि प्रथम र दोस्रो किस्ताको रकम पठाइसकिएको जानकारी उनले दिए ।

प्रधानमन्त्री ओलीले २०८१ माघ महिनामा मात्रै भूकम्प प्रभावितहरूका लागि थप रु.८० करोड निकासा भएको र जाजरकोट भूकम्पको विस्तृत क्षति आँकलनका लागि इन्जिनियरहरूको पहिलो टोली यसै हप्ता देखि फिल्डमा खटिने जानकारी दिए ।

‘मनसुनजन्य विपद् एवं भूकम्पबाट प्रभावितहरूको समस्या समाधानका लागि विपद् व्यवस्थापन राष्ट्रिय परिषद्को मिति २०८१ पौष २८ गते बसेको बैठकले रु. १ खर्ब १ अर्बको पुनर्निर्माण तथा पुनर्स्थापना योजना स्वीकृत गरी निजी आवास र भौतिक पूर्वाधार पुनर्निर्माणको लागि स्पष्ट मार्गचित्र तयार भएको छ,’ ओलीले भने, ‘सो को प्राथमिकताको आधारमा कार्यान्वयन हुँदै जानेछ ।’