झापाको शिवसताक्षीमा ६ हजार ९२६ परिवार धनीपूर्जाको पर्खाइमा

शिवसताक्षी, १९ जेठ । शिवसताक्षी नगरपालिकामा भूमिहिन सुकुम्बासी, दलित र अव्यवस्थित बसोबासी नागरिकहरूका लागि जग्गा धनीपूर्जा वितरण प्रक्रियाबारे जानकारी दिन एक दिवसीय अभिमुखिकरण कार्यक्रम सम्पन्न गरिएको छ । आइतबार शिवसताक्षी नगरपालिकाको आयोजनामा तथा भूमि समस्या समाधान आयोग झापा जिल्लाको समन्वयमा कार्यक्रम अभिमुखिकरण गरिएको हो ।

अभिमुखिकरणमा जग्गा धनीपूर्जा वितरणका लागि आवश्यक प्रक्रिया, स्थानीय तह र जिल्ला आयोगको भूमिकाबारे जानकारी दिइएको थियो । भूमि आयोगका सदस्य लक्ष्मीप्रसाद आचार्यका अनुसार आयोगले झापाको बुद्धशान्ति, कनकाई, शिवसताक्षी र दमक नगरपालिकामा भूमिहिन नागरिकलाई धनीपूर्जा वितरणको काम अघि बढाएको छ ।

हाल बुद्धशान्ति र कनकाई नगरपालिकामा करिब ५ सय धनीपूर्जा वितरणको तयारी भइरहेको छ । कनकाईमा केही धनीपूर्जा वितरण भइसकेको जानकारी दिँदै आचार्यले नेपालभर १ लाख ९७ हजार २९८ जनाबाट धनीपूर्जाका लागि निवेदन परेको उल्लेख गरे । साथै, १ करोड २५ लाख कित्ता जग्गा अझै दर्ता प्रक्रियामा नरहेको तथ्यांक पनि प्रस्तुत गरिएको छ ।

भूमिहिन सुकुम्बासी तथा दलितहरूलाई शहरी क्षेत्रमा ७.६ धुर, उपशहरी क्षेत्रमा १ कठ्ठा र ग्रामीण क्षेत्रमा ५ कठ्ठा १८ धुर आवासीय जग्गा निःशुल्क उपलब्ध गराइनेछ । अव्यवस्थित बसोबासीहरूलाई पनि न्यूनतम ७.६८ धुरदेखि अधिकतम १ विघा ९ कठ्ठा १० धुरसम्मको जग्गा उपलब्ध गराइनेछ । कृषि प्रयोजनको जग्गाका लागि न्यूनतम ५ प्रतिशतदेखि १० प्रतिशतसम्मको मालपोत शुल्क निर्धारण गरिएको छ ।

शिवसताक्षी नगरपालिकामा हालसम्म भूमिहिन दलित ९४, भूमिहिन सुकुम्बासी ४६७ र अव्यवस्थित बसोबासी ६ हजार ३६५ गरी कुल ६ हजार ९२६ जनाको निवेदन दर्ता भएको छ । तीमध्ये १ हजार ८३० जनाको विवरण आयोगको सफ्टवेयरमा इन्ट्री भइसकेको छ ।

वडा नं. २ का ४९ वटा फाइल जिल्ला आयोगमा पठाइएको र ती धनीपूर्जा वितरण प्रक्रियामा रहेको शिवसताक्षी नगरपालिकाले जनाएको छ । वडा नं. १ मा रहेका महारानी झोडा, लखनपुर, तोपगाछी, धरमपुर, सतासीधाम, शिवगञ्ज क्षेत्रका १३६ फाइलमध्ये २६ को नापजाँच सम्पन्न भइसकेको छ ।

शिवसताक्षी नगरपालिका भूमि आयोगका फोकल पर्सन डिल्ली नेपालका अनुसार वडा नं. २ का ५३ फाइलमध्ये ४९ को नापजाँच सकिएको छ र धनीपूर्जा निर्माण प्रक्रिया अघि बढाइएको छ ।

अभिमुखिकरणमा नगरप्रमुख मेगाहाङ्ग थोप्राले विगतमा गठन भएका आयोगहरूले काम अधुरो छाड्दा नागरिक मर्कामा परेको बताएका छन । हाल नगरपालिकामा भूमि सम्बन्धी कार्यका लागि ५ जना जनशक्ति कार्यरत छन, भने आवश्यकता अनुसार जनशक्ति वृद्धि गरी काम तीव्र बनाउने योजना रहेको छ ।

राधाकृष्ण आयोगले संकलन गरेको फाइल केन्द्रिय आयोगको सफ्टवेयरमा इन्ट्री हुन नसक्दा केही ढिलाइ भएको र नयाँ निवेदन संकलन भइरहेको जानकारी दिँदै नगरप्रमुख थोप्राले अबको काम छिटो सम्पन्न गरिने बताए ।

कार्यक्रममा भूमि समस्या समाधान आयोगका अध्यक्ष मदन अधिकारीले अब आयोगको काम पुनः सुरुबाट होइन, निरन्तरताका साथ अघि बढ्ने स्पष्ट पारे । “अब जसरी भए पनि धनीपूर्जा वितरण हुन्छ,” उनले भने, “शिवसताक्षीमा केही प्राविधिक समस्या थियो, त्यो अब समाधान हुँदैछ।”

उनका अनुसार झापामा हाल ५०० धनीपूर्जा वितरणको तयारी भइरहेको छ भने कमल गाउँपालिकाका एक नागरिकले ५१ वर्षपछि धनीपूर्जा पाएका उल्लेखनीय उदाहरण हुन ।

अभिमुखिकरण कार्यक्रममा वडाध्यक्षहरू हर्क सिगु, बहादुर आङ्बो, सिकिन पासवान, लक्ष्मी चेम्जोङ, डिल्लीलाल फेम्बु, माओवादी केन्द्रका अध्यक्ष दुर्गा नेम्वाङ र राष्ट्रिय स्वतन्त्र पार्टीका सभापति गंगाराम कडरिया लगायत १२ जना सहभागी थिए। उनीहरूले सार्वजनिक, राजमार्ग आसपासका तथा बन क्षेत्रसँग जोडिएका जग्गामा देखिएका समस्याबारे जिज्ञासा राखेका थिए ।

कार्यक्रमको सञ्चालन नगरपालिका प्रशासन प्रमुख डिल्ली नेपालले गरेका थिए भने सहजीकरण भूमि आयोगका सदस्य लक्ष्मीप्रसाद आचार्यले गरेका थिए ।

The post झापाको शिवसताक्षीमा ६ हजार ९२६ परिवार धनीपूर्जाको पर्खाइमा appeared first on Jhapa Online.