मस्को । रुसी राष्ट्रपति भ्लादिमिर पुटिन र अमेरिकाका नवनिर्वाचित राष्ट्रपति डोनाल्ड ट्रम्पबीच युक्रेन द्वन्द्वबारे गत साता फोनमा कुराकानी भएको भन्ने अमेरिकी सञ्चारमाध्यममा आएको समाचारको क्रेमलिनले सोमबार खण्डन गरेको छ ।

क्रेमलिनका प्रवक्ता दिमित्री पेस्कोभले वासिङ्टन पोस्टमा प्रकाशित समाचार गलत सूचना मात्र भएको बताएका छन् ।

ट्रम्पले बिहीबार पुटिनसँग फोनमा कुरा गरेर द्वन्द्व नभड्काउन आग्रह गरेको ‘द वासिङ्टन पोस्ट’मा उल्लेख गरिएको छ ।

‘द पोस्ट’का अनुसार ट्रम्पले उक्त फोनवार्तामा पुटिनलाई युरोपमा वासिङ्टनको ठूलो सैन्य उपस्थिति रहेको स्मरण गराएका थिए ।

ट्रम्पले युक्रेनको युद्ध चाँडै समाधान गर्ने विषयमा थप कुराकानी गर्ने इच्छा व्यक्त गरेको अमेरिकी पत्रिकासँगको कुराकानीमा उल्लेख गरिएको छ ।

चुनाव प्रचारका क्रममा रिपब्लिकनले केही घण्टाभित्रै युद्ध अन्त्य गर्न सक्ने र पुटिनसँग सीधै कुरा गर्ने सङ्केत ट्रम्पले दिएका थिए ।

ट्रम्पले आफूले कसरी शान्ति सम्झौता गर्न चाहेको र कुन शर्तमा प्रस्ताव गर्न लागेको भन्नेबारे केही बताएका भने छैन् ।

रुसी राष्ट्रपति पुटिनले युक्रेनलाई शान्ति वार्ताको पूर्वशर्तका रूपमा आफ्नो पूर्वी र दक्षिणी क्षेत्रका भूभागहरू फिर्ता गर्न माग गरेका छन् ।

‘द पोस्ट’का अनुसार बिहीबारको फोन वार्तासँग परिचित व्यक्तिहरूले ट्रम्पले पुटिनसँग भूमिको प्रश्न छोटो समयका लागि उठाएको बताएका छन्।

ट्रम्प निर्वाचित भएपछि युक्रेनका राष्ट्रपति भोलोदिमिर जेलेन्स्कीले पुटिनलाई कुनै पनि प्रकारको सहुलियत दिन नहुने चेतावनी दिएका छन् ।

उनले भनेका छन्, ‘मस्कोको अन्य कुनै पनि कट्टरपन्थी मागलाई स्वीकार गर्नु वा जमिन सुम्पनुले क्रेमलिनलाई हौसला दिनेछ र थप आक्रामकता निम्त्याउनेछ ।’