सूर्य नेपाल गल्फ टुर सोमबारदेखि

काठमाडौं । सूर्य नेपाल गल्फ टुर सोमबारदेखि सुरु हुने भएको छ ।

आईतबार आयोजना गरिएको पत्रकार सम्मेलनमा गल्फ टुर गोकर्ण गल्फ क्लबमा आयोजकले जानकारी गराएको हो ।

७२ होलमा खेलाइने टुर सेन्ट्रल ओपनसँगै नयाँ सिजन सुरुवात हुने भएको हो ।

प्रतियोगितामा ३३ जना व्यावसायिक खेलाडीले प्रतिस्पर्धा गर्ने छन् । साथै १२ जना एमेच्योर खेलाडीको पनि सहभागिता हुने आयोजकले अपेक्षा गरेका छन् ।

शीर्ष २१ प्रो र ६ एमेच्योरले मात्र कट पार गरेर अन्तिम ३६ होल खेल्नेछन् । कट पार गर्ने प्रोले नगद पुरस्कार पाउनेछन् ।

प्रतियोगिता ४ दिन चल्ने छ । प्रतियोगिताको विजेताले १ लाख ५० हजार रुपैयाँ पाउनेछन् । उपविजेताले १ लाख र तेस्रो हुनेले ७५ हजार प्राप्त गर्नेछन् ।

टुरमा यस सिजन ८ प्रतियोगिता हुनेछ । टुरको कुल पुरस्कार रकम ६७ लाख ३२ हजार रूपैयाँ रहेको छ । टुरमा ३ ह्यान्डिक्याप भन्दा कम रहेका एमेच्योरले खेल्न पाउनेछन् ।