शीतलहरका कारण महोत्तरीका १४ स्थानीय तहका विद्यालय बन्द

जनकपुरधाम । महोत्तरीका १४ स्थानीय तहले बढ्दो शीतलहरबाट बालबालिकाको स्वास्थ्यमा पर्न सक्ने भन्दै सामुदायिक र संस्थागत विद्यालयहरूमा जाडो बिदा दिएका छन् ।

बर्खे बिदाबाट कट्टा हुने गरी विद्यालयमा बिदा दिइएको हो । हुस्सु र शीतलहरले बालबालिकालाई विद्यालय आउँदा स्वास्थ्यमा प्रतिकुल असर पर्न सक्ने भन्दै जाडो बिदा दिएका हुन् ।

मनरा सिस्वा नगरपालिकाले २४ देखि २९ पुससम्म, पिपरा गाउँपालिकाले २२ देखि २९ पुससम्म, महोत्तरी गाउँपालिकाले २४ देखि २६ पुससम्म, एकडारा गाउँपालिकाले २४ पुसदेखि १ माघसम्म, जलेश्वर नगरपालिकाले २३ देखि २९ पुससम्म, भंगहा नगरपालिकाले २४ देखि २९ पुसम्म, मटिहानी नगरपालिकाले २२ देखि २९ पुससम्म, लोहारपट्टी नगरपालिकाले २२ पुसदेखि १ माघसम्म, बल्वा नगरपालिकाले २३ देखि २९ पुससम्म, सम्सी गाउँपालिकाले २४ देखि २९ पुससम्म, सोनमा गाउँपालिकाले २४ देखि २९ पुससम्म, औरही नगरपालिकाले २५ देखि २९ पुससम्म, रामगोपालपुर नगरपालिकाले २४ देखि २९ पुससम्म र बर्दिवास नगरपालिकाले २५ देखि २९ पुससम्म जाडो बिदा दिएका छन् ।

केही पालिकाले शीतलहरले दैनिक ज्यालादारी गर्ने र विभिन्न कारण घरबाट निस्कनु पर्नेहरूका लागि विभिन्न चोक तथा वस्तीमा सामुहिक घुर (आगो ताप्ने ) व्यवस्था गरेका छन् ।

बर्दिवास नगरपालिका, रामगोपालपुर नगरपालिकासहित केही स्थानीय तहमा दाउरा बालेर घुरको व्यवस्था सुरु भैसकेको छ भने केहि पालिकामा दाउराको जोहो भैरहेको बताइएको छ ।