साल्फोर्डको पोस्टमा सिटीले गर्‍यो गोल वर्षा, म्याकएटीको ह्याट्रिक

काठमाडौं । इंग्लिस फुटबलमा चौथो डिभिजनको क्लब साल्फोर्ड एफसीको पोस्टमा प्रिमियर लिगको साविक विजेता म्यानचेस्टर सिटीले गोलको वर्षा गरेको छ ।

जेम्स म्याकएटीको उत्कृष्ट प्रदर्शनप्रेरित सिटीले एफए कपमा शनिबार राति साल्फोर्डमाथि ८–० गोल अन्तरको सानदार जित दर्ता गरेको हो ।

घरेलु मैदान इतिहाद रंगशालामा सिटीलाई जित दिलाउन म्याकएटीले ह्याट्रिक गर्दा जेरिमी डोकुले दुई तथा डिभाइन मोबामा, निको ओ’राइली र ज्याक ग्रेलिसले समान एक–एक गोल गरे ।

खेलको आठौं मिनेटमा डोकुको गोलमार्फत सिटीले अग्रता लिएको थियो । २०औं मिनेटमा मोबासले टोलीको अग्रता दोब्बर बनाए ।

ओ’राइलीले खेलको ४३औं मिनेटमा टोलीका लागि तेस्रो गोल गरे । ४९औं मिनेटमा ग्रेलिसले पेनाल्टीमार्फत गोल गर्दा सिटीको अग्रता ४–० मा पुग्यो ।

म्याकएटीले ६२औं मिनेटमा गोल गर्दा सिटी ५–० ले अगाडि बढ्यो । सात मिनेटपछि नै डोकुले पेनाल्टीमार्फत व्यक्तिगत दोस्रो गोल गरे ।

म्यानकएटीले ७२ र ८१औं मिनेटमा गोल गर्दै आफ्नो ह्याट्रिक पूरा गरेका हुन् ।

जितसँगै सिटीले चौथो चरणमा स्थान सुरक्षित गरेको छ ।

शनिबारै सम्पन्न अन्य खेलमा जित निकाल्दै कोभन्ट्री, लिड्स युनाइटेड, स्टोक सिटी, एक्सटर सिटी र बर्नेलीले पनि चौथो चरणको यात्रा तय गरेका छन् ।