‘नेपाल डायलग यूके’ मा गैरआवासीय नेपाली र नागरिकताबारे छलफल एजेन्डा

लण्डन । सेन्टर फर नेपाल स्टडिज (सिएनएस) यूकेले गर्दै आएको ‘नेपाल डायलग यूके’ मासिक वेविनारमा यसपटक गैरआवासीय नेपाली र नागरिकताकाबारे छलफल हुने भएको छ ।

अप्रिल ५ तारिख बेलायतको स्थानीय समयअनुसार बिहान १० देखि ११:३० बजेसम्म जुमबाट सञ्चालन हुने सो छलफलको विषय ‘गैरआवासीय नेपाली र नागिरकताको प्रश्न: नेपालले कसरी विश्वव्यापी परिवेशबाट फाइदा लिन सक्ला ?’ राखिएको छ । 

सो छलफलमा बेलायतको लिड्स विश्वविद्यालयका अन्तर्राष्ट्रिय कानुनका प्राध्यापक सूर्यप्रसाद सुवेदी, नेकपा एमाले स्थायी कमिटी सदस्य डा राजन भट्टराई र स्वतन्त्र अनुसन्धाता डा मीना पौडेल सहभागी हुने सिएनएस यूकेले जनाएको छ ।

प्राध्यापक सुवेदीसित गैरआवासीय नेपालीहरुको अभियानको शुरुवातबाट नै नीति तथा विचार निर्माणमा सक्रिय सहभागी भएको अनुभव छ ।

त्यस्तै, जवाहरलाल नेहरु विश्वविद्यालयबाट विद्यावारिधि गरेका भट्टराईले लामो समय नेकपा एमालेको विदेश विभाग प्रमुखका रुपमा काम गरेका छन् भने बेलायतको न्यूक्यासल विश्वविद्यालयबाट विद्यावारिधि गरेकी डा पौडेल प्रवासन (माइग्रेसन) का बारेमा गहिरो रुचि राख्छिन्।

छलफलमा वक्ताहरुले आफ्नो प्रस्तुति दिनुका साथै सहभागीहरुको जिज्ञासाको पनि जवाफ पनि दिने कार्यक्रम छ । 

छलफलमा भाग लिने चाहनेहरुले जूम लिंक https://us06web.zoom.us/j/86235798097 मार्फत सहभागी हुन पाउने आयोजकहरुले बताएका छन् ।

सिएनएस यूकेले सन् २०२५ को शुरुवातदेखि हरेक महिनाको पहिलो आइतबार बिहान १० बजे प्राज्ञिक तथा अन्य व्यावहारिक विषयहरुमा प्रवचन र छलफल आयोजना गर्दै आएको छ ।