क्षेत्रीय सहकार्यप्रति बिमस्टेक सधैँ प्रतिबद्ध छ : महासचिव पाण्डे

काठमाडौं  । बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) का महासचिव इन्द्रमणि पाण्डेले क्षेत्रीय सहकार्यप्रति बिमस्टेकको प्रतिबद्धता रहेको बताएका छन् ।

इन्टरनेशनल रिलेसन एन्ड ग्लोबल डिप्लोमेसी डाइलग (आईआरजीडीडी) र एम्बेसेडर क्लबद्धारा बिहीबार आयोजित बिमस्टेक सदस्य राष्ट्रहरूका विशिष्ट प्रतिनिधिहरूसँग उच्चस्तरीय बैठकलाई सम्बोधन गर्दै महासचिव पाण्डेले साझा भूगोल, सभ्यतागत सम्पदा, सामाजिक संरचना र पारस्परिक रूपमा बुझ्न सकिने भाषाहरूद्वारा आधारित बिमस्टेकको अद्वितीय पहिचानमाथि प्रकाश पारे ।

‘यो मेरो तेस्रो काठमाडौं भ्रमण हो । विश्वव्यापी जलवायु चुनौतीहरूलाई सम्बोधन गर्ने उद्देश्यले नेपाल सरकारले आयोजना गर्ने अन्तर्राष्ट्रिय संवाद सगरमाथा संवादमा भाग लिन मे महिनामा आउने छु,’ उनले भने ।

महामहिम पाण्डेले विदेश मामिलामा सामाजिक सञ्जालको बढ्दो प्रभावको बारेमा पनि विचार व्यक्त गरे । ‘कूटनीतिज्ञहरूका लागि जनताबाट प्रतिक्रिया प्राप्त गर्नु र विदेश नीतिहरू उनीहरूको कल्याणका लागि बनाइएका छन् भनी सञ्चार गर्नु चुनौतीपूर्ण छ,’ उनले भने ।

महासचिव पाण्डेले आईआरजीडीडीलाई शुभकामना व्यक्त गर्दै भविष्यको क्षेत्रीय संवादलाई आकार दिन यसले खेल्ने भूमिका र सम्भावनामाथि जोड दिए । उनले नीतिगत आदान–प्रदान र सहयोगलाई सुदृढ पार्न बिमस्टेक–सम्बद्ध थिंक ट्याङ्कहरूको सञ्जाल विस्तार गर्ने बारेमा पनि उल्लेख पनि गरे ।

आईआरजीडीडी र एम्बेसेडर क्लबकी अध्यक्ष अध्यक्ष डा. शर्मिला पराजुली ढकालले दिगो कृषि भविष्य निर्माण गर्न समर्पित दूरदर्शी नेताहरूलाई एकै ठाउँमा स्वागत गर्न पाउँदा खुशी लागेको बताइन् ।

स्पेन र ओमानको लागि पूर्वराजदूत समेत रहेकी ढकालले भुटानका कृषि तथा पशुपक्षीमन्त्री योन्टेन फुन्त्शो र उनको नेतृत्वमा रहेको टोली, बिमस्टेकका महासचिव पाण्डे, उद्योग मन्त्रालयका सचिव कृष्णबहादुर राउत, वाणिज्य तथा आपूर्ति मन्त्रालयका सचिव गोविन्द्रबहादुर कार्की, ऊर्जा, जलस्रोत तथा सिँचाइ मन्त्रालयका सचिव सुरेश आचार्य र कृषि तथा पशुपक्षी मन्त्रालयका सचिव डा. गोविन्दप्रसाद शर्मा लगायत विभिन्न मुलुकका प्रतिनिधि, पूर्वराजदूतहरु र व्यापारिक क्षेत्रका प्रतिनिधिहरुलाई समेत स्वागत गरेकी थिइन् ।

कार्यक्रममा बिमस्टेक राष्ट्रका विशिष्ट व्यक्तिहरूको उपस्थिति रहेको थियो ।