कर्णालीमा बेपत्ता व्यक्तिको खोजी गर्न सशस्त्र प्रहरीको गोताखोर परिचालन

काठमाडौँ। 

कालिकोट जिल्लाको पचालझरना गाउँपालिका–८ स्थित कर्णाली नदीमा बेपत्ता व्यक्तिको खोजीकार्यको लागि सशस्त्र प्रहरी बल नेपालकोे गोताखोर परिचालन गरिएको छ ।
कालिकोटको नरहरी गाउँपालिका–१ कोटवारी बस्ने १६ वर्षका बिराज विष्ट शुक्रबार नुहाउने क्रममा नदीमा डुवेर बेपत्ता भएका थिए ।

उनी बेपत्ता भएको सशस्त्र प्रहरी बल नेपाल आश्रित गुल्म कालिकोटलाई जानकारी गराएपछि सशस्त्र प्रहरी बल नेपाल नं. ६ महेश्वरी बाहिनी मुख्यालय सुर्खेतबाट ५ जना गोताखोरसहितको टोली खटिएको छ । सो टोलीले आजै घटनास्थल पुगी उनको खोजीकार्य गर्ने छ ।

त्यसैगरी दैलेख जिल्लाकोे चामुण्डविन्दासैनी नगरपालिका–९ स्थित कर्णाली नदिमा बेपत्ता भएका अन्दाजी १६ वर्षिय भुवन सार्किको खोजीकार्य जारी छ ।
कर्णाली नदीमा पोडी खेल्ने क्रममा शुक्रबार बेपत्ता भएको जनाकारी पाउनासाथ सशस्त्र प्रहरी बल नेपाल जलविद्युत आयोजना सुरक्षा बेश डावबाट उनको खोजीकार्यको लागि सुरक्षाकर्मी खटाइएको छ । बेपत्ता उनकोहिजो (शुक्रबार ) साँझसम्म खोजीकार्य गर्दा फेला नपरेपछि कार्यालय फर्केको थियो भने सो टोलीले आज पनि खोजीकार्य जारी राखेको छ ।