पाकिस्तानी रक्षामन्त्री भन्छन् – भारतले जितको अपेक्षा गरेको थियो, तर असफल भयो

काठमाडौं । पाकिस्तानका रक्षामन्त्री ख्वाजा आसिफले भारतको आक्रामक रणनीति पूर्णरूपमा असफल भएको दाबी गरेका छन् ।

युद्धविरामपछि पत्रकार सम्मेलनमा बोल्दै उनले भारतले सजिलो विजयको अपेक्षा गरेपनि सैन्य र कूटनीतिक दुवै मोर्चामा आफैँ उजागर भएको बताए ।

“भारतीय घमण्ड अब हावामा विलिन भइसकेको छ,” मन्त्री आसिफले भने ।

आसिफले पछिल्ला सैन्य झडपका क्रममा भारतले मे ७ मा पाकिस्तानमा ‘अकारण आक्रमण’ गरेको र कम्तीमा ३१ जना निर्दोष नागरिक मारिएको दाबी गरे । जवाफस्वरूप पाकिस्तानले पाँच भारतीय लडाकु विमान र धेरै ड्रोन खसालेको र “अपरेसन बुनयान-उल-मर्सूस” नामक सैन्य कारबाहीअन्तर्गत भारतीय सैन्य ठाँउहरूमा सटीक प्रहार गरिएको दाबी गरे ।

उनले भने, “भारत पाकिस्तानको छिटो र स्पष्ट प्रतिकारबाट आश्चर्यचकित भयो ।”

आसिफका अनुसार भारतले आफ्ना दाबीहरूमा अन्तर्राष्ट्रिय समुदायलाई विश्वस्त गराउन सकेन भने पाकिस्तानको संयम, स्पष्टता र तथ्यले भरिएको दृष्टिकोणले विश्वभरबाट प्रशंसा पाएको छ । “भारतको कथानक प्रमाणविहीन रह्यो, जसले यसको विश्वसनीयतामा ठूलो क्षति पुर्‍यायो,” उनले बताए ।

उनले भारतले पहलगाम आक्रमणपछि एकपक्षीय रूपमा सन्धिबाट पछि हटेकाले हाल सिन्धु जल सन्धि निलम्बित रहेको बताए । पाकिस्तानले यो कदमविरुद्ध अन्तर्राष्ट्रिय कानुनी प्रक्रिया अघि बढाउने तयारी गरिरहेको समेत उनले जानकारी दिए ।