इरानको इजरायलमाथि नयाँ क्षेप्यास्त्र हमला, एकअर्काका महत्वपूर्ण पूर्वाधारमा आक्रमण

काठमाडौं ।  मध्यपूर्वमा इजरायल र इरानबीचको सीधा सैन्य भिडन्त थप चर्किएको छ। दुवै देशले एकअर्काका संवेदनशील र महत्वपूर्ण पूर्वाधारहरूमा आक्रमण गरेको दाबी गरेका छन्।

इरानले इजरायलमाथि नयाँ क्षेप्यास्त्र हमला गरेको छ भने इजरायल रक्षा बल (IDF) ले तेहरानमा सैन्य लक्ष्यहरूमा आफ्ना आक्रमणहरू जारी राखेको बताएको छ।

इजरायली सेनाका अनुसार, आक्रमणको निशानामा इरानी रक्षा मन्त्रालयको मुख्यालय र प्रतिरक्षा आविष्कार तथा अनुसन्धान संगठन (Organization of Defensive Innovation and Research) लगायतका स्थानहरू थिए।  इरानी सञ्चारमाध्यम तस्निम समाचार एजेन्सीले पनि इजरायली आक्रमणले तेहरानको नोबानियाद क्षेत्रस्थित रक्षा मन्त्रालयको एक मुख्यालय भवनमा सामान्य क्षति पुगेको पुष्टि गरेको छ।

यसको जवाफमा, इरानको इस्लामिक रिभोलुसनरी गार्ड्स (IRGC) ले इजरायलमाथि आक्रमण गरेको जनाएको छ। आईआरजीसीले इजरायली सुविधा केन्द्रहरू  “फाइटर जेट इन्धन उत्पादन र ऊर्जा आपूर्ति केन्द्रहरू” लाई निशाना बनाएको बताएको छ। आईआरजीसीले इजरायली आक्रमण जारी रहेमा इरानको जवाफी हमला तीव्र हुने चेतावनी दिएको छ। आईआरजीसीले इरानमा आक्रमण गरिएका क्षेत्रहरूमा “तीनवटा क्रुज मिसाइल, १० वटा ड्रोन, र दर्जनौं  माइक्रो-यूएभीहरू ट्र्याक गरी नष्ट गरेको” दाबी पनि गरेको छ।

दुवै देशले गरेको आक्रमणको भिडियो र रिपोर्टहरू  बाहिरिएका छन्। बीबीसी भेरिफाई गरेका भिडियोहरूमा तेहरानको उत्तरपश्चिममा रहेको शाहरान तेल डिपोमा ठूलो आगलागी देखिएको छ, जुन इजरायली आक्रमणको निशाना बनेको अनुमान गरिएको छ। इरानको तेल मन्त्रालयले अवस्था  नियन्त्रणमा रहेको बताए पनि इरानी सञ्चारमाध्यमले मानिसहरूलाई डिपोबाट  टाढा रहन  आग्रह गरेका छन्। यसैबीच, बीबीसीले भेरिफाई गरेको अर्को भिडियोमा इरानबाट प्रहार गरिएका मिसाइलहरू पछि हाइफा तेल रिफाइनरी नजिकै आगो बलेको देखिएको छ।

यस बढ्दो तनावले इरानभित्रका नागरिकहरूको जीवनमा पनि असर पारेको छ। पेट्रोल पम्पहरूमा लामा लाइनहरू र अधिकारीहरू बस्ने ठाउँबाट मानिसहरू सरेको खबर छ।   इरानमा इन्टरनेटको अवस्था बिग्रँदै गएकाले विदेशमा रहेका इरानीहरूलाई आफ्ना परिवारहरूसँग सम्पर्कमा रहन गाह्रो भइरहेको छ।