पश्चिमी वायु र स्थानीय वायुको प्रभावले पहाडी भेगमा वर्षाको सम्भावना, सतर्क रहन आग्रह

काठमाडौं । हाल देशमा पश्चिमी वायु र स्थानीय वायुको साथै बङ्गालको खाडीबाट आइरहेको जलवाष्पयुक्त हावाको आंशिक प्रभाव रहेको मौसम पूर्वानुमान महाशाखाले जनाएको छ। यसकै कारण अहिले देशका पहाडी क्षेत्रमा आंशिकदेखि सामान्य बदली देखिएको छ भने अन्य ठाउँमा मौसम मुख्यतया सफादेखि आंशिक बदली रहेको छ। कोशी, बागमती, गण्डकी र कर्णाली प्रदेशका पहाडी भेगका एक-दुई स्थानमा मेघगर्जनसहित हल्का वर्षा भइरहेको छ।

आज दिउँसो देशभर आंशिकदेखि सामान्य बदली रहने  महाशाखाले जानकारी दिएको छ। पहाडी भूभागका केही स्थानहरूमा र बाँकी भूभागका एक-दुई ठाउँमा चट्याङसहित हल्कादेखि मध्यम वर्षाको सम्भावना छ। यसका साथै, देशका हिमाली क्षेत्रका थोरै ठाउँमा हिमपातको समेत पूर्वानुमान गरिएको छ। लुम्बिनी र सुदूरपश्चिम प्रदेशको तराई भेगमा हावाहुरी चल्न सक्ने सम्भावना पनि रहेको छ।

आज राति देशको पहाडी भूभागका एक-दुई स्थानमा मेघगर्जनसहित हल्का वर्षाको सम्भावना छ। कोशी, बागमती र गण्डकी प्रदेशका हिमाली भेगका एक-दुई स्थानमा हल्का वर्षासँगै हिमपातको पनि सम्भावना रहेको महाशाखाले जनाएको छ।

महाशाखाले कोशी, बागमती, गण्डकीलगायत देशका पहाडी भूभागका थोरै स्थानहरूमा र बाँकी भूभागका एक-दुई स्थानमा चट्याङसहित हल्कादेखि मध्यम वर्षाको सम्भावना रहेकाले दैनिक जनजीवन, कृषि, स्वास्थ्य, सडक र हवाई यातायातमा समेत असर पर्न सक्ने भन्दै आवश्यक सावधानी अपनाउन सबैलाई आग्रह गरेको छ।