शाहरुखको मन्नतमा अवैध निर्माण कार्य भएको गुनासो आएपछि…

काठमाडौं । बलिउड अभिनेता शाहरुख खानको बंगला मन्नतमा वन विभाग र बृहन्मुम्बई महानगरपालिका (बीएमसी)को टोली पुगेको छ ।

मुम्बईको बान्द्रा ब्यान्डस्ट्यान्ड क्षेत्रमा रहेको मन्नत हाल मर्मत भइरहेको छ । उक्त मर्मतले तटीय नियमन क्षेत्र (CRZ) नियमहरू उल्लङ्घन गरेको गुनासोपछि विभाग र बीएमसीको टोली टोली निरीक्षणका लागि त्यहाँ पुगेको टाइम्स अफ इन्डियाले जनाएको छ ।

वन विभागका एक अधिकारीले पुनर्निर्माण अनुमतिको बारेमा गुनासो पाएकाले स्थलको भ्रमण गरेको र चाँडै नै प्रतिवेदन तयार पारेर पेस गर्ने जानकारी दिए ।

साइटमा उपस्थित अर्का अधिकारीले भने, “मन्नतका कर्मचारीहरूले टोलीलाई नवीकरण कार्यको लागि आवश्यक सबै कागजातहरू र अनुमतिहरू चाँडै पेस गर्ने बताएका छन् ।”

यसैबीच शाहरुखकी म्यानेजर पूजा ददलानीले कुनै गुनासो नभएको बताइन् । उनले निर्माण कार्य निर्धारित निर्देशिकाअनुसार भइरहेको बताइन् ।

पूर्व आईपीएस अधिकारीले उठाएका थिए प्रश्न

पूर्व आईपीएस अधिकारी तथा वकिल वाईपी सिंहले शुक्रबार निर्माणमाथि प्रश्न उठाएका थिए । सिंहले भने, “मन्नतको मूल नाम भिल्ला भियना थियो । यो एक सम्पदा संरचना हो । पछि यसको नाम परिवर्तन गरिएको थियो ।”

सिंहका अनुसार सन् २००५ मा बंगलाको पछाडि सात तल्ले भवन निर्माण गरिएको थियो । त्यतिबेला शहरी जग्गा सीमा ऐन लागू थियो । यसअन्तर्गत ठूलो भवन निर्माण गर्न सकिँदैनथ्यो । यो अवस्थाबाट बच्न बीएमसीबाट १२ वटा साना फ्ल्याटको लागि स्वीकृति लिइएको थियो । स्वीकृति पाएपछि यी फ्ल्याटहरूलाई जोडेर ठूलो विलासी घर बनाइएको थियो ।

वाईपी सिंहले नगरपालिकाका अधिकारीहरूको मिलेमतो बिना यो कारबाही हुन नसक्ने आरोप लगाए । अब यो ऐन खारेज भइसकेको छ, त्यसबेला गरिएको कारबाही अझै पनि मान्य मानिन्छ ।

वाईपी सिंहले यो पनि भने, “मन्नतका मालिकहरूले यी १२ वटा फ्ल्याटहरू फेरि छुट्याउनु आवश्यक छ । यसले सामूहिक आवासको उद्देश्य पूरा गर्नेछ ।”