विगतको जस्तै संसद् विघटन गर्ने प्रयास सफल नहोस् : प्रचण्ड

काठमाडौं । प्रमुख प्रतिपक्ष दल नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले जनता सजग हुनुपर्ने बेला आएको बताएका छन् ।

शुक्रबार काठमाडौंमा आयोजित नेपाल राष्ट्रिय प्राध्यापक सङ्गठनका पूर्वकेन्द्रीय संयोजक अखिलेश्वरलाल दासको दोस्रो स्मृति दिवसलाई सम्बोधन गर्दै उनले बताएका हुन् ।

“विगतको जस्तै संविधानलाई मिच्ने, संसद् विघटन गर्ने कोसिस सफल नहोस् । प्रतिगमनतिर जाने प्रयास सफल नहोस् । यसमा हामी सजग बस्नुपर्छ, जनता जाग्नुपर्छ,” उनले भने ।

प्रचण्डले अर्कोतिर अराजकतवादीहरू सलबलाउन थालेको टिप्पणी गरे । “अराजकतवादीहरूले जनतामा फैलिँदो निराशालाई उपयोग गरेर त्यसको माध्यमबाट प्रतिक्रान्तितिर लैजाने प्रयास गरेका छन्, त्यो सफल नहोस् । त्यसका खातिर हामीले खबरदारी गर्नुपर्छ,” उनले भने ।

उनले आफूहरू सदैव संविधान र जनताको पक्षमा रहेको पनि बताए ।